Maria Cristina zubia zaharberrituko dute
Obra zortzi hilabetez luzatuko da eta 605.962 euroko aurrekontua du. Zubia 1905ean inauguratu zuten, eta HEOBPB planaren barruan babestua dago.
Lanak zubiaren hegoaldeko aldean hasi dituzte. (Argazkia: Iñaki Agirre) Udalak Maria Cristina zubiaren zaharberritze lanak abiatu zituen joan den astean, eta Marisol Garmendia Gune publiko eta hiri proiektuen zinegotziak obra horri dagozkion datuen berri eman du gaur. Azaldu duenez, lanak zortzi hilabetez luzatuko dira, eta euren helburua “hiriko zubi ederrenetako baten distira berreskuratzea” izango da.
Proiektuak hainbat arlo ditu: batetik, zubiari itsatsitako itsasoko gatza, hegaztien gorotzak eta inguruko obren hautsa garbituko dituzte, eta bestetik, urteetan zehar eraikuntzan sorturiko pitzadurak konponduko dira. Gainera, zubiaren apaindurak zaharberrituko dira, eta bere alboetako zutabeen buruan dauden zaldien estatuak urre kolorez margotuko dituzte.
Lehenengo lau hilabeteetan, zubiaren hegoaldeko aldean garatuko dituzte obrak, eta hurrengo lau hilabeteetan, berriz, iparraldekoan arituko dira lanean. Proiektuak, 605.962 euroko aurrekontua du, eta Madrilgo enpresa espezializatu bati esleitu diote.
Zubia Donostiako ate nagusietako bat dela azpimarratu du Garmendiak, hiriko geltokietarako sarbidea delako, eta arte ederren erakusleiho bat ere badela nabarmendu du, Daniel Zuloagaren zeramikei eta Mariano Benlliureren irudiei erreferentzia eginez. Eraikuntza 1905ean inauguratu zuten, eta HEOBPB planaren barruan babestua dago.
Azken zaharberritze lanak 1984an egin zizkioten, eta hurrengo urteko San Sebastian egunean berrinauguratu zuten. 2017an, berriz, zubiaren estrukturaren indartze lanak egin zituzten, denborale gogorrei eusteko gai izan dadin.
