Donostia Kulturak ikastaroen eskaintza iragarri du
2019-2020 ikasturteko ikastaroak Datorren ikasturteko ikastaroen eskaintzaren berri eman du Donostia Kulturak. Orotara 642 ikastaroko aukera izango dute herritarrek, erdia baino gehiago euskaraz. Ohi bezala askotariko gaiak landuko dira: arte plastikoak, eskulanak, arte eszenikoak, irudia, soinua eta komunikazioa, literatura, autoezagutza eta osasuna eta humanitateak.
Irailaren 9tik 27ra artean matrikulatu ahal izango da, bai kultur etxeetan eta baita internet bidez ere, Donostia Kulturaren webgunearen bidez. Ikastaroei buruzko informazio guztia bertan kontsulta daiteke dagoeneko.
Iraupenari dagokionez, ikasturte osokoak, lau hilabetekoak eta trinkoak dira eta hainbat motatakoak: orokorrak, espezialitateetakoak edota egile-ikastaroak. Era berean, adin-tarte guztietarako moduko ikastaroak egongo direla azpimarratu dute, haurrentzat, gazteentzat eta helduentzat, eta baita bereziki 55 urtetik gorakoentzat ere.
Aurreko ikasturteetako balorazioa
Joan den ikasturtean 4.850 matrikulazio inguru jaso zituela nabarmendu du Donostia Kulturak, eta parte-hartzaileen balorazioa oso altua izan zela. Era berean, azken urteetan arrakastatsuenak arte eszenikoetako ikastaroak izan direla azpimarratu du.
