Kalean bizi diren pertsonen egoeraren inguruan hausnartzeko film labur bat egin du Besarkadak egitasmoak
Gipuzkoako Foru Aldundiaren eta Emaus Gizarte Fundazioaren elkarlanetik jaiotako Besarkadak egitasmoak Donostiako kaleetan bizi diren pertsonen inguruan hausnartzeko film labur bat egin du. Joseba Parronek grabatu du bideoa, eta hainbat eragileetako kideek zein norbanakoek hartu dute parte proiektuan, hala nola Modaharakoek.
Donostiako historiak izenburupean, modu parte-hartzailean idatzitako gidoiak kalean bizi direnen eta hiriko gainerako herritarren rolak trukatzen ditu. Duela bi aste, Donostiako kaleetan bizi diren gazte magrebtarren kolektiboak jasaten duen egoeraren inguruko erreportajea argitaratu zuen Irutxuloko Hitzak: guztira 140 inguru dira eta baldintza lazgarrienetan bizirauten dute hirian, kalean lo egiten eta herritarren eta instituzioen arrazismoa egunero jasaten.
Besarkadak egitasmoak Gipuzkoako herritarren arteko trukaketa interkulturalak sustatzen ditu, lurraldeko aniztasuna balioan jarri eta harreman berriak sortzeko helburuarekin. Film laburra proiektu horren barruan antolaturiko topaketa baten emaitza da.
