Hainbat mozketa egingo dituzte Erdialdean Woody Allenen filmaketa dela-eta
Maria Kristina zubiaren inguruak (Irudia: Donostiako Udala) 
Woody Allenen filmaren grabaketa dela-eta hainbat mozketa egingo dituzte gaur Maria Kristina zubiaren inguruetan. Valentin Olano kalea ibilgailuentzat erabat itxita egongo da 9:00etatik 17:00etara, bi norabideetan. 12:00etatik 23:00etara, aldiz Maria Kristina zubiaren inguruan, Gernikako Arbola eta Prim kalean egingo dituzte oinezkoentzako eta ibilgailuentzako aldizkako mozketak.
Bertan egongo diren teknikariek emango dituzte oinezkoentzako eta ibilgailuentzako beharreko argibide eta zirkulazio-aukerak.
Inguru horretatik igarotzen diren autobusek ere aldaketak izango dituzte. 10:00etatik 20:00etara 17. linean Gros-Amara-Miramon noranzkoan eta 24. linean Altza-Gros-Antiguo-Intxaurrondo noranzkoan Bilbo plaza, Mendeurrena eta Antso Jakituna 12 geltokiak kenduko dira eta Iparreko Geltokia, Antso Jakituna 28 II eta Pio XII geltokietara eramango dira hurrenez hurren. Era berean, Gros alderantz egun guztian zehar aldizkako mozketak egingo dira Gernikako Arbola pasealekuan.
