Beroa elkartea izango da Itzurun konpartsaren Ekimen Erraldoiaren protagonista
Itzurun konpartsaren Ekimen Erraldoiaren kamiseten salmenta puntua. (Argazkia: Gipuzkoa Solidarioa)
Zortzigarren urtez Ekimen Erraldoia egitasmo solidarioa jarri du martxan Itzurun Erraldoien eta Buruhandien konpartsak. Urtero, kamisetak saltzen dituzte, eta irabazi asmorik gabeko elkarte bati ematen zaio salmentatik lortutako dirua. Aurten, Beroa elkartea izango da kanpainaren onuraduna.
Ekimen Erraldoiaren bidez bildutako dirua honako elkarteek jaso zuten aurreko urteetan: Aspanogik, Gure Nahiak, Juneren Hegoak,-ek Dravetek eta Pausokak. Aurten, 1.000 kamiseta jarriko dituzte salgai, bakoitza 10 euroan, eta Super Amarak dituen lau supermerkatuetan (Amara, Loiolako Erribera, Antigua eta Erdialdea) erosi ahalko dira. Kamisetaren irudia Iñigo Garvi diseinatzaileak egin du.
Beroa elkartearen helburu nagusia da babesgabe edo arriskuan dauden haurrak eta nerabeak babesteko baliabideak hedatzea. Horretarako, sentsibilizazio soziala lantzen dute, eta haur eta nerabe horiek hartuko dituzten familiak erakartzeko programak eta proiektuak sustatzen dituzte. Programa horiek eragile, profesional eta erakunde desberdinen lanarekin osatzen dira.
Berrikuntzak
Urtero bezala, erraldoiak eta buruhandiak hiriko kaleetatik zehar ibiliko dira Aste Nagusian. Aurten berritasun gisa, abuztuaren 12an, 18:00etatik aurrera, erraldoiek eta buruhandiek Kontxa pasealekuko ibilbidea osorik egingo dute Antigua auzora iristeko. Gau horretan auzoko Merkatu Zaharrean hartuko dute atseden; hurrengo egunean Matia kaletik irten eta Sert plazara iritsiko dira. Han geldialdi bat egingo dute, nahi duten haur guztiek haiekin batera argazkiak atera ahal izateko. Abuztuaren 14an, berriz, konpartsak Amara auzotik egingo du irteera; Loiolako Erriberatik hasita Olaeta plazaraino.
Abuztuaren 15ean, Irungo erraldoien konpartsari harrera egingo dio Itzurun konpartsak. Egun horretan, gainera, Irungo Musika Bandak kontzertu bat egingo du Bulebarrean, eta joko duten aurreneko pieza bi konpartsek dantzatuko dute batera, 19.30ean.
Hona hemen egun horretako egitaraua:
- 12:30 Donostiako eta Irungo erraldoien konpartsak hiriko Erdialdetik. Irteera Zuloaga plazatik
- 15:00 – 18:00 Donostiako eta Irungo erraldoien erakustaldia Gipuzkoa plazan
- 18:00 Donostiako eta Irungo erraldoien konpartsak hiriko Erdialdetik. Irteera Gipuzkoa plazatik
- 19:30 Donostiako eta Irungo konpartsek emango diote hasiera Irungo Hiriko Musika Bandaren kontzertuari
- 19:40 Donostiako eta Irungo erraldoien konpartsak Parte Zaharretik
