Realeko nesken taldearentzako zerbitzu hobeak eskatu ditu RealSocialismo! taldeak
Zale eta akziodunen taldeak dokumentu bat aurkeztu du emakumeen taldearen marketina eta profesionalizazioa aregotu eta Zubietako partidetarako irisgarritasuna eta segurtasuna hobetzeko proposamenekin.
Realeko jokalariak, Anoetan, Granadako finalean irabazitako koparekin. (Argazkia: Reala) 
RealSocialismo! zaletu eta akziodunen taldeak Emakumeen futbolaren egunekorako hobekuntza-proposamenak izeneko dokumentua aurkeztu du, klubak nesken taldeari eskaintzen dizkion zerbitzuak hobetzeko proposamenekin.
Aurkeztutako dokumentuak, besteak beste, Zubietako partidetarako irisgarritasuna eta segurtasuna hobetzeko neurriak, partida eguneko esperientzia aberasteko ideiak, emakumezkoen futbol sekzioaren marketina osatzeko pausuak eta taldearen profesionalizazioa azkartzeko proposamenak ditu.
Proposamen horiek epe ertain eta luzerako estrategia planifikatu batean txertatu ditzala eskatu diote zale eta akziodunek Realari: “Goi mailako emakumezkoen futbolean berdintasunaren aldeko eta hau hartzen ari den indarra finkatzeko beharrezko diren ekimenen buru izango den Reala nahi dugu”.
Jarraian, RealSocialismok! klub donostiarrari eginiko proposamenen zerrenda, arloka:
- Irisgarritasuna: Zubietara heltzeko aukera bakarra auto pribatua da eta, maiz, aparkalekuak gainezka egiten du. Honen ondorioz errepide bazterrean autoa mordoa pilatzen dira. Mutilen taldearen edo GBCren partidetan jarri ohi diren autobus anezkak ezartzea eskatzen da, Realeko Fundazioak egin izan duen bezala.
- Partida eguna: giro hotzari aurre egiteko eta bertaratuen esperientzia hobetzeko partida oro Z1 zelaira mugitu beharko litzateke, edukiera gehiago duela eta irisgarriagoa delako. Era berean, megafonia sistema eta esatari batek asko lagunduko luke.
- Marketina: Egun, oraindik ez da posible emakumeen sekzioko ekipaziorik erostea. Aukera bakarra mutilen taldeko kamiseta erostea eta pertsonalizatzea da. Realsocialismo! lantaldeak klubak dituen salmenta puntuetan, Anoetako zein Elkano kaleko denda fisikoetan, webguneko online dendan zein partida batzuetan ezarri diren espazio puntualetan salgai egotea ezinbestekotzat jotzen Era berean, web bidez ematen diren partidetan Valencia CFk egiten duen bezala markagailua eta denboraren berri ematea, esataria ezartzea eta plano gehiago eskaintzea.
- Segurtasuna: Zubietan zein Anoetan jokatutako partidetan mutilen lehen taldean erabiltzen den prozedura imitatzea, bata eta bestearen arteko ezberdintasunak kontuan izanda.
- Profesionalizazioa: 2018an eztanda egin zuen kontratuen polemikarekin amaitzeko eta Klubetik eta Administrazio Kontseilutik eskainitako babesa argi geratzeko, baldintza duin eta egokiak eskaintzea taldekide guztiei. Era berean, adosteko dagoen hitzarmenean Realari aldaketa gidatzeko pausuak ematea eta ligan erreferente izatea eskatzen diogu.
