Txantxarreka gaztetxeak bere VI. urteurrena ospatzeko festa egingo du urriaren 19an
(Argazkia: Txantxarreka) 
Antiguako Txantxarreka gaztetxeak sei urte bete ditu, eta urteurrena ospatzeko, urriaren 19an egun osoko egitaraua duen festa egingo dute auzoan.
Goiza historian zehar Donostian egondako okupazio eta gaztetxeen errepaso batekin hasiko dute, erakusketa, proiekzio eta solasaldi batez lagundurik.
Gero, berriz, bazkaria egingo dute gaztetxeko terrazan. Otordurako tiketak Matia kaleko Platero eta Trikuharri tabernetan jarri dituzte salgai, 15 eurotan, eta erosiko dutenek urteurreneko kamiseta jasoko dute trukean.
Arratsaldean, hiriko gaztetxe, gune autogestionatu eta gazte asanbladekin batera, ginkana bat egingo dute Antiguan zehar, txarangaren doinuak girotuta.
Azkenik, Herenegun eta Silicies Grizzlies taldeen kontzerturekin amaituko dute urteurren festa.
Jarraian, eguneko egitaraua:
- 12:30. Donostiako okupazio eta gaztetxeak iruditan: Lehenaren atzetik hamaika. Proiekzio komunikatua(k) eta solasaldia.
- 14:30. Bazkaria gaztetxean.
- 17:00. Donostiako gaztetxe eta gazte asanbladen arteko ginkana auzoan zehar, txarangarekin.
- 20:30. Kontzertuak: Herenegun eta Silicies Grizzlies.
