Kiroletako Udal Patronatuaren zerbitzuen eta instalazioen araudia onartu du udalak
Hiriko kiroldegi bat. 
Aurkezturiko alegazio batzuk aztertu eta hainbat aintzat hartuta, Donostiako Udalak onartu du Kiroletako Udal Patronatuko Kirol Zerbitzu eta Instalazioen Araudia. Erabiltzaileen eskubideak eta betebeharrak arautzen ditu, eta kirol gune bakoitzeko erabilerak orokorrak eta bereziak.
2017koa zen orain arteko azken araudia, baina indarrean sarturiko lege berriekin, eta erabileren zein eskaeren bilakaerarekin beharrezkotzat jo zuen udalak araudia gaurkotzea.
Bestalde, Kirol Udal Patronatuaren teknikariek ofizioz bi kontu aurkitu dituzte. Lehenengoak, Anoeta Estadioa espresuki araudi honen ezarpen eremutik kanpo uzten du, eta besteek testu batzuen azalpenei aipamena egiten die. Adibidez, udako jardueretara doazen umeen kasuan, arduradun bakoitzari bost umeko gehieneko muga ezartzen zaio.
Araudi berriari dagokionez, datu pertsonalak eta erabiltzaileen irudiak babesteari buruzko alderdi berriak biltzen ditu, haien eskubideak bermatuz eta erabilera babestuz. Araututako gaietako bat argazki-kamerak edota bideo-kamerak erabiltzea da; izan ere, teknologia horren erabilera orokorra ez denez orain dela urte gutxi arte gertatu, aurreko araudiak ez zuen horrelakorik aurreikusi.
Hori dela eta, debekatuta dago pertsonen intimitatea kaltetu dezaketen kirol-instalazio guztietan gailu horiek erabiltzea, nahiz eta grabazio horiek egiteko aukera ematen zaien familientzako oroitzapen gisa edo kirol-errendimenduko entrenamenduetarako soilik egiten denean. Nolanahi ere, debekatuta egongo dira aldageletan, komunetan, saunetan eta antzeko guneetan.
Araudi honetan jasotako beste berrikuntzetako bat udal-kirol instalazioetan antolatutako kirol lehiaketak eta erakustaldiak arautzea da, eta horietan kontuan hartu dira kiroleko indarkeriaren, arrazakeriaren, xenofobiaren eta intolerantziaren aurkako legeak aurreikusten dituen xedapenak. Gauza bera gertatzen da euskararen erabileraren normalizazioan indarrean dauden araudiekin, eta emakumeen eta gizonen berdintasunerako legeetan, araudi berri honen hainbat ataletan ere agertzen baitira.
Horrez gain, udal kirol instalazioetan eta antolatutako kirol ekitaldi edo probetan publizitatearen edukia ere arautzen du, eta bai instalazioetan baita antolatzen diren ekitaldietan ere, 20 gradu baino gehiagoko edarien publizitatea debekatzen da. Ekitaldi horiek adin txikikoei zuzendurikoak badira, edozein alkoholdun edarien publizitatea debekatuta egongo da. Era berean, tabakoaren publizitatea erabat debekatuta dago.
Gai orokor horiez gain, araudiak beste gai asko ere arautzen ditu, besteak beste, arreta pertsonalizatua eta lehentasunezkoa mugitzeko zailtasunak dituzten pertsonen eskubidea, ikastaroak eman edo irabazizko jarduerak baimenik gabe egitea, edo iraingarriak, indarkeriazko pankartak edo izaera arrazista edo sexista erakustearen debekua ere.
