Hiriko ekialdetik iritsiko dira Errege Magoak Donostiara, eta ez da animaliarik egongo desfilean
Jon Insausti zinegotziak aurkeztu du Errege Magoen kabalkada. (Argazkia: Iñaki Agirre) 
Ekialdeko Errege Magoak Altzatik helduko dira Donostiara igandean, urtarrilaren 5ean, hiriko haur guztiak agurtzeko eta euren gutunak jasotzeko asmoarekin. Arratsaldeko desfilean animaliarik egongo ez bada ere, zaldiz iritsiko dira Meltxor, Gaspar eta Baltasar Altzako Harria parkera, 11:00etan, Errege Segizioak eta Gauerdi txarangak lagunduta. Altzako haurrak agurtuko dituzte han, Errege Segizioarekin, Errege Postariekin eta Joselontxos txarangarekin batera. Handik, goiz osoko ibilbidea hasiko dute, eta Bidebietako Juan XXIII plazan (11:35ean), Intxaurrondoko Sagastieder plazan (12:10ean), Martuteneko plazan (13:00etan), Antiguako Jose Maria Sert plazan (13:40ean) eta udaletxeko terrazan (14:15ean) geldialdiak eginez. Geldialdi horietan guztietan, haurrak agurtuko dituzte Errege Magoek, baita gutunak jaso ere.
Udal ordezkariak ere agurtuko dituzte, eta 15:30ean Errege Magoei egingo dieten harrera hasiko dute udal batzar aretoan. 17:00etatik aurrera, udaletxeko terraza itxita egongo da, eta harrerak 17:30era iraungo du. Hala ere, harrerara joan ezin izan duten haurrek pajeei gutunak eman ahal izango dizkiete Errege Magoak udaletxe barruan dauden bitartean. Ondoren, pajeek Erregeei emango dizkiete gutunak. Kabalkada 18:00etan abiatuko da Bulebarretik, eta Erdialdeko kale nagusiak zeharkatu ondoren, Bulebarrean bukatuko da.
Errege Magoez gain, opariak paketatzeko taldeak, buruhandiak, ardi zangaluzeak, trikitilariek, txarangak, suhiltzaileek, pajeak eta Errege Postariak egongo dira kabalkadan, besteak beste. Gainera, Mari Domingi eta Olentzeroren eredua jarraituko dute Errege Magoek, eta ez da animaliarik egongo kabalkadan. 450 pertsonak hartuko dute parte kabalkadan, eta 2.500 kilo gozoki jaurtiko dizkiete haurrei karrozetatik, pertsona zeliakoentzat eta diabetikoentzat aproposak izango direnak. 19:00etan amaituko da kabalkada, eta Los Pasai txarangarekin batera, hainbat ospitale bisitatuko dituzte orduan Errege Magoek, han dauden haurrak ere agurtzeko. Era berean, desfilea ikusi nahi duten pertsonei Ijentea kaletik sartzen lagunduko diete, eta gune batzuk erreserbatuko dizkiete Harria parkean eta Hernani kalean. Gainera, zeinu hizkuntzaren interprete bat izango dute Erregeek, entzumen desgaitasunen bat duten haurrekin ere hitz egin ahal izateko.
Bost karroza egongo dira desfilean: Errege paketatzaileen karroza, jaiotza tradizionalarena eta errege bakoitzarena, hain justu. Meltxor erregearen karroza motibo greziarrekin apainduta egongo da, Gasparrenak estetika egiptoarra izango du eta Baltasarrenak gamelu handi bat izango du elementu adierazgarritzat. Bakoitzak, gainera, aipatu apaindurekin zerikusia duen ikuskizun bana izango du inguruan. Bestalde, hiru argi izar egongo dira kabalkadaren buruan, eta ikuskizun batek jarraituko ditu. Atzerago, ardi zangaluzeen ikuskizuna eta Gaudiren arkitektura modernistan eta Salvador Daliren arte surrealistan oinarritutako ikuskizuna egongo dira.
Udalaren gomendioak
Udalak azaldu du udaletxeko harreran ezin izango direla hiru Errege Magoak agurtu eta, beraz, haur bakoitzak zein agurtu nahi duen erabaki beharko duela, hiru ilara egingo baitituzte. Era berean, publikoari eta euren etxeetatik kabalkada ikusten duten pertsonei eskatu diete gozokirik eta objekturik ez botatzeko, nahasketak (Errege Magoen gozokiak zeliakoentzat eta diabetikoentzat egokiak dira) eta istripuak saihesteko. Prim kalean gozokiak bota ohi dituzten pertsonei zuzendu diete eskaera hori, bereziki.
Azkenik, desfilea dela eta, Erdialdean hainbat trafiko mozketa egongo direla nabarmendu dute, baita autobus lineetan aldaketak egongo direla ere. Era berean, antolakuntzak kabalkadaren inguruan jarritako zintak eta hesiak errespetatzeko eskatu dute.
