Urumea ibaira egunero ur beltzak zuzenean isurtzen direla salatu du Eguzkik
Santa Katalina zubi ondoko ur beltzen isurketak. (Argazkia: Eguzki) 
Eguzki Talde Ekologistak salatu du Santa Katalina zubiaren ondoan, Frantzia pasealekuaren aldean, “etengabe” ur beltzak Urumea ibaira zuzenean isurtzen direla. Ekologistek azaldu dutenez, Donostiako Udaltzaingoari jakinarazi diote arazoa. Izan ere, Eguzkiren arabera, zonalde horretako ur kolektoreak “pitzadura larriak” ditu, eta handik pasatzen diren ur beltzek horma zeharkatzen dute, horrela ibaira helduz, “hamar bat zuloren bidez”. Eguzkik gaineratu du kiratsaren bitartez atzeman dutela arazoa.
Talde ekologistak azaroan salatu zuen euria egiten zuenean ur beltzak isurtzen zirela Santa Katalina zubi ondotik Urumeara, eta udalari azalpenak eskatu zizkion. Eguzkiren arabera, ez dute udalaren partetik inongo informaziorik jaso, eta egoera “larriagoa” da orain, isurketak “egunero” egiten direlako, ez soilik euria egiten duenean. Hori dela eta, azalpenak emateaz gain, arazoari irtenbide bat emateko eskatu diote udalari.
