Erraustegirako martxako auzipetuen aldeko elkarretaratzea egingo dute epaitegian
Erraustegiaren Aurkako Mugimenduak beste elkarretaratze bat egin zuen abendua hasieran, auzipetuak epailearen aldetik pasa ziren egunean. (Argazkia: Iñaki Agirre) Zubietako erraustegirako azken martxan parte hartu zuten lau pertsonen aurkako epaiketa salatzeko, Erraustegiaren Aurkako Mugimenduak elkarretaratze bat egingo du ostegunean, 10:30ean, Donostiako epaitegian. Duela hilabete, abenduaren 4an, arrazoi berarengatik elkartu ziren, auzipetuak epailearen aurrean hitz egiten ari ziren bitartean.
Ertzaintzak jarri du haien kontrako salaketa, desordena publikoak eragin izana leporatuz, baina lau epaituek adierazi dute haiek ez zirela martxako antolatzaileak izan eta ez zutela leporatzen dietena egin. Martxa 2018ko irailaren 29an egin zuten, erraustegiaren aurkako protesta modura, baina azpiegiturara iritsi aurretik, Ertzaintzak bidea blokeatu zien herritarrei. Hainbat minutuz bidea blokeatzen egon ostean, poliziak herritarrengana jo zuen azkenean.
Erraustegiaren aurkako mugimenduak adierazi du auzi honen atzean erraustegiaren aurkako protesta soziala zigortzeko borondate bat dagoela. Epaituetako bi Zubietakoak dira, eta besteak, berriz, bata Lasartekoa eta bestea Donostiakoa.
