Urtarrilaren 30eko greba orokorraren mobilizazioak, auzoz auzo
Urtarrilaren 30eko greba orokorreko mobilizazio nagusiez gain, beste hainbat mobilizazio egingo dituzte Donostiako auzoetan egunean zehar. Egian, esaterako, kale bira egingo dute auzotik, 8:00etan Iruresoro plazatik hasita. Ondoren, 10:30ean, hamaiketakoa egingo dute Plaza Haundin, eta 11:00etan auzoko zutabea Grosera (Saguesko zutabera) eta Artzain Onera (manifestazio nagusira) abiatuko da. Arratsaldean ere kale bira egingo dute auzoko kaleetatik, 17:00etan, ondoren Bulebarrera joateko, arratsaldeko manifestazio nagusiarekin bat egitera. Era berean, 11:00etan eta 17:0o0etan zaintza gune komunitarioak antolatuko dituzte auzoan. Bestalde, burrunba egingo dute asteazken gauean etxeetako leihoetatik, 21:00etatik 21:15era.
Grosen, asteazkenean, hilaren 29an, hasiko dira jarduerak egiten: 20:00etan, Nere etxea defendatuko dut hitzaldia emango dute Bizilagunekin plataformako Eskubitxo eta Zaldi Urdina kideek, Hondarpe auzo elkartean; 21:30ean, afari autogestionatua egingo dute Hondarpen bertan; eta, 22:00etan, burrunba egingo dute auzotik. Greba egunean, ordea, goizean goiz hasiko dira, 8:00etan auzo gosaria egingo baitute Hondarpen, eta han egongo da 9:00etatik 11:00etara informazio gunea, auzotik piketeak egiten dituzten bitartean. 11:00etan hamaiketakoa egingo dute auzo elkartean, eta 11:20ean Saguesko zutabera abiatuko dira. Goizeko manifestazioaren ondoren, 14:00etan, auzo bazkaria egingo dute Marruma elkartean, eta 16:00etatik 18:00etara informazio gunea egongo da Katalunia plazan, baita piketeak auzotik ere.
Amaran, 8:00etan auzo gosaria egingo dute bakoitzak bere etxetik eramandakoa partekatuz, eta 9:00etan kale bira egingo dute, 10:30ean Artzain Onera abiatzeko. 14:00etan auzo bazkaria egingo dute, 16:30ean kale bira, eta 18:00etan auzoko zutabea Bulebarreko manifestaziora abiatuko da.
Intxaurrondon ere 8:00etan gosaria egingo dute, Plazara Goazen lokalean, eta 9:00etan auzoko kale bira hasiko dute, 11:20ean Saguesko zutabera abiatzeko. Arratsaldean, 14:30ean, Zulo Zahar elkartean bazkaria egingo dute, eta 16:30ean hasiko dute arratsaldeko kale bira, ondoren Bulebarreko manifestaziora joateko. Era berean, zaintza guneak egongo dira 10:30etik 13:00etara eta 16:00etatik 19:30era, Lizardi 25eko elkarte gunean.
Añorgakoek ere mobilizazioak iragarri dituzte, eta 8:00etan Decathlonen egongo dira, eta 9:30ean Urbil merkataritza gunean. Ondoren, 10:30ean, autokarabana egingo dute Añorgatik Antiguara, 11:45ean Antiguako tuneleko zutabearekin bat egiteko.
