Easo Musika Eskolako ikasleek kontzertuak egingo dituzte otsailean zehar
Easo musika eskolako ikasleak, emanaldi batean. (Argazkia: Easo abesbatza) Otsailean zehar, Easo Musika Eskolako ikasleek hainbat kontzertu egingo dituzte Easo abesbatzaren egoitzan. Marañon doktorearen pasealekuko egoitzako entsegu gela eta auditorioa musikaz beteko dituzte ikasleek, eta musika eskolak eskaintzen dituen instrumentu guztien doinuak entzuteko aukera izango dute entzuleek.
Lehen kontzertua gaur izango da, otsailaren 11n, 18:15ean, eta biolin eta harpa ikasleek egingo dute. Bigarrena, ostegunean, hilaren 13an, flauta-joleen eta harpa-joleen txanda izango da; 18:00etan izango da kontzertua. Otsailaren 14an, berriz, bi kontzertu izango dira: alde batetik, 18:00etan, gitarra emanaldia egingo dute entsegu gelan, eta 18:15ean, auditorioan biolontxelo ikasleek egingo dute musika saioa.
Datorren astean, hilaren 18an, gitarra eta gitarra elektrikoa jotzen ikasten ari diren gazteek 19:00etan egingo dute emanaldia. Asteazkenean, hilaren 19an, hainbat instrumentu elkartuko dituzte auditorioan, 18:30ean: pianoa, gitarra, perkusioa eta klarinetea. Azkenik, kontzertuen zikloa amaitzeko, musika eskolako pianistek eta gitarristek, emanaldia egingo dute auditorioan, 18:30ean.
