Maria Cristina hotela gaixo arinak hartzeko eskaini du Udalak
(Argazkia: Xabier Etxabe) Maria Cristina hotela kudeatzen duen Marriot Internationalek eta Donostiako Udalak akordioa lortu dute Osakidetzarekin, koronabirusarekin kutsatutako gaixo arinak hoteleko 120 ohetan zaintzeko.
Eneko Goia alkateak atzo azaldu zuenez, berez etxean egon daitezkeen gaixoak hartuko lituzke bost izarreko hotelak, senideak kutsatzeko arriskua dutelako, edo etxean bakartuta egoteko behar diren baldintzak ez dituztelako.
120 gela izango dira, gehienak bikoitzak, eta Osakidetzak jarraipen lana garatuko du. Horrela, Euskal Herrian antzeko funtzio hau burutzeko moldatu den hirugarren hotela litzateke, Gasteizeko Lakua eta Iruñea Parkekin batera.
