Starlight Gaueko jarduerak antolatu du Aranzadik, izarren argia balioan jartzeko
(Argazkia: Pixabay) 
Aranzadi Zientzia Elkarteak bat egin du izarren argiaren inguruan kontzientziatzeko Nazioarteko Starlight Konferentziak 2007tik urtero egiten duen Starlight Gaua kanpainarekin. Hain zuzen, gaur, hilak 20, Argi kutsaduraren zergatia hitzaldia eskainiko dute zuzenean, zientzia elkartearen Youtubeko kanalean, 19:00etan. Era berean, gauean etxetik ikusten dituzten izarren argazkiak sare sozialetan zabaltzera animatu dituzte herritarrak, #zeruaetxetik traola erabiliz.
2007ko apirilaren 20an hartu zuen Nazioarteko Starlight Konferentziak gaueko zeruaren balioak babesteko kontzientziazio kanpaina egiteko ardura, erakunde publiko eta pribatuei egitasmoan parte hartzeko deialdia zabalduz. Era berean, hamar puntuko adierazpen bat argitaratu zuten orduan, gaueko zeruaren defentsan. Aranzadiren webgunean irakurri daiteke adierazpen hori, osorik.
