Kirk Douglas aktorea omenduko du Kresala Zineklubak
Kirk Douglas, 'Gunfight at the O.K. Corral' filmean. 
Kresala Zineklubak joan den otsailaren 5ean hildako Kirk Douglas (1916-2020) aktore estatubatuarra omenduko du aste honetako Instagrameko zuzeneko emanaldian. Gunfight at the O.K. Corral (John Sturges, 1957) filmaren inguruan hitz egingo dute Pedro Saldaña eta Izaskun Montes solaskideek gaur, hilak 27, 19:30ean egingo duten zuzenekoan. Emanaldian ez dute filma proiektatuko, haren inguruan hitz egin baizik. Hala ere, obra Filmin plataforman ikusgai dagoela gogoratu dute zineklubekoek.
Kresala Zinekluba duela gutxi hil diren aktore eta zinemagileak omentzen ari da astelehenero Instagrameko zuzenekoetan, koronabirusarengatik ezin baitituzte euren ohiko film proiekzioak egin Trueba zinema aretoetan. Martxoan Juanmi Gutierrez (1945-2019) zinemagilea omendu ondoren, Max vox Sydow (1929-2020), Anna Karina (1940-2019) eta Lucia Bose (1931-2020) aktoreak eta Jose Luis Cuerda (1947-2020) zinemagilea omendu dituzte apirilean zehar.
