Uliako auzo elkarteak bilera bat eskatu dio berriz Aranzadiri, Uliako mintegietako parkearen inguruan hitz egiteko

2020/04/27

Uliako auzo elkarteak duela hamazazpi hilabete eskatu zion Jokin Otamendi Aranzadi Zientzia Elkarteko presidenteari, haztegi historikoen parkearen eta Soroborda eta Buskando ur biltegiei buruz hitz egiteko. Auzo elkarteak, ordea, bilera hori oraindik egin ez dutela salatu du, eta, zientzia elkarteari zuzendutako gutun baten bitartez, behingoz egiteko eskatu dute berriz ere, Uliako mintegietako parkearen garrantzia nabarmenduz.

Uliako parkeko ondarea “lurpetik atera beharreko memoriaren zati bat” dela deritzote Uliakoek, eta, beraz, han ez dela eraikuntza gehiagorik behar. Izan ere, auzo elkartearen arabera, Aranzadiko zuzendaritzako idazkari bat mintegi zaharren parkean eraikitzeko proiektuak aurkezten ari da aspalditik. Horren harira, auzo elkarteak azpimarratu du Aranzadi ez dela jabetzen “alderdi politiko batek” zientzia elkartea “tresna gisa” erabiltzen duela, eta ezin dutela “hainbeste urtetan lortutako ibilbide zientifikoa eta sinesgarritasun soziala belztu”.

Iazko abenduan Aranzadikoekin bilera bat egitea lortu zutela adierazi du auzo elkarteak, baina salatu dute ez zela eurek eskatutakoa izan, idazkari bat eta boluntario gazte bat baino ez zirelako joan. Horregatik, beste bilera bat eskatu dute, Otamendiren presentzia exijituz. Jarraian, gutun osoa:

ARANZADI ZIENTZIA ELKARTEKO ZUZENDARITZA BATZORDEKO JAUN- ANDREEI

17 hilabete igaro dira zuengana jo genuenetik (Otamendi Jn.) bilera bat hitzartzeko. Bilera horretan, ulia- ategorrietako bizilagunentzat ez ezik, Donostiako gizarte osoarentzat ere hain garrantzitsua den gai bati buruz hitz egin nahi genuen, hau da: haztegi historikoen parkea eta herritarrak urez hornitzeko lehen deposituak (Soroborda eta Buskando).

2014an, lagapen-akordio bat sinatu genuen Donostiako Udalarekin, hiri- zaintzako akordio bat (Land Stewardship), parkearen kudeaketa eramateko. Finkak dituen paisaia-, historia- eta ondare-balioetan oinarritzen zen; berez, bere osotasunean kontserbatzea justifikatzen dutenak. Bai bere elementu arkitektonikoengatik, bai gaur egun ikus daitezkeen lorezaintzako erabilera tradizionalengatik: laborantza-kutxatilak eta horientzako estalkiak, “Ohe beroetan” laborantza egiteko erabiltzen zirenak; negutegiak (palmondoena, hazitegietarako berotegiak, erdi lurperatuta dagoena…); lorezainek landareak ureztatzeko erabiltzen zuten urmaela, zeinek behin lekuz aldatuta zelaietan jartzen ziren, hiri osoan zehar landatu aurretik; zaindariaren eta langilezainaren etxeak; hiria urez hornitzeko lehen biltegiekin batera, unitate historiko bat egin eta osatzen zuten, guri aurrekoak utzi zizkigutenak, eta, beraz, erabaki zentzugabeetatik babestu behar direnak. Erabilerarik gabe zegoen, eta bizilagunen, ekologisten eta diziplina tekniko desberdinetako pertsonen artean bere distira atera egin dugu eta ateratzen ari gara, higiezinen espekulazioari buruzko erabaki politikoen ondorioz zegoen utzikeriatik.

Parkearen diseinua, bere bide eta espazio irekiekin, eta baita erreserbatuenekin ere. Tamaina ederreko zuhaitz-aleak: zedroak, magnolioak, astigar zuriak, haginak, beltxaleak, aranondoak, ereinotz gereziondoak, zeiboa… Horregatik guztiagatik, eta hiriaren historiaren parte delako, benetakoaren balioarekin batera, galdu aurretik, lurpetik atera behar den memoriaren zati delako. Ez dugu eraikuntza gehiagorik behar, Otamendi Jn., paisaia historiko baten aurrean gaude, benetako oasi bat eraikuntzen eremu nahasi baten barruan.

Duela gutxi, Eusko Jaurlaritzak euskal ondare historikoaren kultura-ondasun gisa onartu dizkigu, bai herritarrak urez hornitzeko deposituak, bai horiek kokatuta dauden ingurunea eta baita zaintzailearen etxea eta parkearen itxieretaraino iristen den ingurunea ere, eta monumentu-multzoaren kategoria eman die, babes-maila ertaina izanik.

Otamendi jaunaren erantzuna, bilerak edukirik ez zuela argudiatuta, kezka sortu zigun, egiari huts egiten ziolako; izan ere, jakin badakigu Zuzendaritza horretako idazkariak denbora daramala Ulia- Ategorrietako MINTEGI zaharren parkean eraikitzeko proiektuak aurkezten.

Gure Elkarteak badu zuei jakinarazteko zerbait, bezero gisa eta Natur Zientzien Elkarte horretako bazkide gisa, beraz, berriro ere bilera bat eskatu behar dugulakoan gaude, uste baitugu Zuzendaritza horretako kideek ez dakitela alderdi politiko batek TRESNA gisa erabiltzen ari dela ARANZADI, eta ARANZADIk ezin duela hainbeste urtetan lortutako ibilbide zientifikoa eta sinesgarritasun soziala belztu, kasu honetan erabat desagertuta dauden, bere oinarri etikoa eta praktika onak modu horretan erabilita.

Joan den abenduan, 2019an, berriro egin genuen eskaera, eta otsailaren 13an berretsi zuten bilera, baina Idazkaria bakarrik joan zen, boluntario gazte batekin batera. Ez zen ez eskatutakoa, ezta espero zena ere, eta, beraz, azkeneko aldiz, Zuzendaritza Batzorde horrekin bilera bat egitea komeni dela berretsi nahi dugu, zuk, Otamendi jauna, buru zaituena.

Donostian, 2020ko martxoaren 31n