Ibaeta Basketek Meiya Tirera pibota fitxatu du
Meiya Tirera jokalaria, Valencia Basketekin partida bat irabazi ostean. (Argazkia: Valencia Basket) 
Ibaeta Basketek bere lehenengo fitxaketa egin du 2020/2021 denboraldira begira: Meiya Tirera (Mali, 1986) pibota. Jokalariak 34 urte ditu eta 1,88 metroko altuera, eta Valencia Basket taldean jokatu du azken urteotan, oso maila altua erakutsiz: batez beste, partida bakoitzeko 8,7 puntu sartu eta 4,6 errebote hartu zituen iazko denboraldian lehenengo mailan.
Hainbat taldetan eta Maliko selekzioan jokatu du Tirerak, eta pozik agertu da Ibaeta Basketek fitxatu izanarekin: “IDK Euskotrenekin sinatu dut oso talde lehiakorra delako, urte asko daramatzaten jokalariekin. Familia talde bat iruditzen zait”. Era berean, datorren denboraldian taldeak garaipen handiak lortu ditzakeela uste du: “Entrenatzailea, Azu, asko gustatzen zait, oso gogor egiten duelako lan eta azkar eta korrika jolastea gustatzen zaiolako, asko defendatuz. Jokalari guztiak elkarrekin bagaude eta gogor egiten badugu lan, oso denboraldi ona egitea espero dut”.
Bestalde, joan den astean bi albiste on izan zituen Ibaeta Basketek: alde batetik, Azu Muguruza entrenatzaileak urtebetez berritu zuen bere kontratua eta, bestetik, Lara Gonzalez kapitainak ere kontratua berritu zuen hurrengo denboraldirako.
