Haurtxokoak, Gaztelekuak eta Kontadores Gazte Zentroa zabalduko dituzte bihartik ekainaren 30era arte
(Argazkia: Donostiako Udala) Donostiako Gazteriak jakinarazi du bihartik, ekainaren 11atik, hilak 30era arte hiriko Haurtxokoak, Gaztelekuak eta Kontadores Gazte Zentroak ateak irekiko dituztela, hainbat salbuespenekin. Uztaila eta abuztuan, aldiz, urtero bezala, itxita egongo dira.
Zabaltzeko, segurtasun-protokoloak jarraituko dituztela iragarri du Duñike Agirrezabalaga Gazteria zinegotziak. Hori dela eta, derrigorrezkoa izango da aldez aurretik hitzordua eskatzea, eta maskara erabiltzea.
Haurtxoko eta Gaztelekuei dagokienez, Grosekoa eta Parte Zaharrekoak itxita jarraituko dute, baina gainontzekoak zabalik egongo dira. Bi txanda egin dira, espazio berean egongo den pertsona kopurua txikitzeko. Jarraian, ordutegiak jasotzen dira:
- Haurtxokoak (Aiete eta Antiguakoak izan ezik): astelehenetik ostiralera, 16:00etatik 19:30tara. Lehenengo txanda 16:00etatik 17:30etara eta bigarrena 18:00etatik 19:30tara.
- Gaztelekuak (Aiete eta Antiguakoak izan ezik): astelehenetik ostiralera, 16:30etatik 20:00etara. Lehen txanda 16:30etatik 18:00etara eta bigarrena 18:30etatik 20:00etara.
- Aieteko Haurtxokoa: astelehenetik ostiralera, 10:00etatik 13:30etara. Lehenengo txanda 10:00etatik 11:30etara eta bigarrena 12:00etatik 13:30etara.
- Aieteko Gaztelekua: astelehenetik ostiralera, 11:00etatik 13:00etara (txanda bakarra).
- Antiguako Haurtxokoa: larunbata, 16:00etatik 18:15etara. Lehenengo txanda 16:00etatik 17:00etara eta bigarrena 17:15etatik 18:15etara.
- Antiguako Gaztelekua: larunbata, 18:30etatik 21:00etara (txanda bakarra)
Kontadores Gazte Zentroak ohiko ordutegia izango du, alegia, asteartetik ostiralera 17:30etatik 20:30etara, eta larunbatetan 17:00etatik 21:00etara. Gazteek entseguak egiteko bi areto zabalduko dituzte, itxialdiaren ondorioz bertan behera gelditutako eskaerei lehentasuna emanez. Era berean, ekainaren 20an, goizeko 10:00etatik 13:00etara, hiritik argazkigintza saioa eskainiko dute. Zortzi plaza egongo dira, 5,25 euroko kostua izango du eta izen-ematea ostiraletik aurrera egin ahal izango da Kontadoreseko webgunean.
