Uda kulturaz beteko du Kutxa Kultur Gauak programak
Sara Mansilla arituko da asteburuko Kutxa Kultur Gauak programan. 
Konfinamendua pasa ondoren, Kutxa Kultur Gauak programa bueltan da, eta uda osorako egitarau zabala prestatu dute. Joan den asteburuan egin zituzten lehenengo kontzertuak Raitx eta Physis Versus Nomos taldeen eskutik, eta antzerkia eta musika izango dira asteburu honetan: Iñigo Salinerok El vasco chino bakarrizketa egingo du ostiralean eta Sara Mansillak kontzertua eskainiko du larunbatean; bi emanaldiak 20:30ean izango dira.
Kutxa Kultur Gauak programak astebururo Tabakaleran eskainiko ditu kultur jarduerak irailaren 26ra, eta egitarau osoa Tabakaleraren webgunean kontsultatu daiteke. Aipatzekoa da uztailaren 3ko emanaldia Mojo Workin jaialdia laguntzeko izango dela, konfinamenduak bete-betean harrapatu baitzuen Donostiako musika beltzaren jaialdia, eta oso egoera larrian utzi zuen, Arkaitz Kortabitarte ‘Punko’ antolatzaileak hedabide honi azaldu zionaren arabera.
