Garaipenera itzuli da Reala Vila-realen
Mikel Oiartzabal Vila-realeko jokalariez inguratuta. (Argazkia: Reala) Hilda zirudien, baina denboraldi amaierara inoiz baino biziago iristea lortu du Realak, Vila-realen aurka 1 eta 2 irabazi ostean. Bi partida geratzen dira denboraldia bukatzeko, eta Imanol Alguacilek gidaturiko taldeak jokoan izango diren sei puntuak lortu beharko ditu Europa Ligako txartela eskuratzeko.
Konfinamenduaren osteko lehen bost partidetan ez bezala, erasokor ibili ziren txuri-urdinak lehen zatian. Joko ausarta eta erasokorra eskaini zuten, eta hirutan bota zuten baloia atera, baina Sergio Asenjok bikain atera zituen jaurtiketak. Lehen zatiko aukera nabarmenenak Nacho Monrealek eta Alexander Isakek izan zituzten; Andoni Gorosabelen erdiraketa buruz errematatu zuen Monrealek, eta Asenjoren geldituaren ostean, Isakek bularrez kontrolatu eta boleaz jaurti zuen atera, baina baloia berriz gelditzea lortu zuen atezain palentziarrak.
Vila-realek ere aukerak izan zituen lehen zatian, baina Miguel Angel Moya Realaren atezainak segurtasunez gelditu zituen jaurtiketa guztiak. Bigarren zatian gogotsuago atera zen Castelloko taldea, eta partida kontrolatzea lortu zuen. Realak, baina, estrategiako bi jokaldiri zukua ateratzea lortu zuen, Willian Josek 61. minutuan eta Diego Llorentek 75. minutuan baloia buruz atean sartzea lortu baitzuten. 85. minutuan iritsi zen Vila-realen gola, Santi Cazorlaren jaurtiketa indartsu batekin, baina Javier Callejaren jokalariek ezin izan zuten punturik lortu.
Lehia estua
Realaren garaipenarekin oso estu daude Europa ligan sartzeko postuak. Emaitza honekin Txapeldunen Ligako postuak guztiz zehaztu dira, eta Real Madril, Bartzelona, Atletiko Madril eta Sevilla izango dira Europako txapelketa nagusia jolastuko dutenak. Vila-real Europa Ligako txartela ziurtatzear dago, eta benetako lehia seigarren eta zazpigarren postuak lortzeko izango da azken bi jardunaldietan. Getafe eta Reala daude bi postu hauetan, 54 punturekin biak, baina Athletic (51 puntu), Valentzia (50 puntu) eta Granada (50 puntu) ate-joka daude.
Azken bi jardunaldietako partida guztiak ordu berean jolastuko dira, eta Reala Sevilla eta Atletiko Madrilen aurka ariko da. Partida zailak izango dira biak, talde sendoak baitira, baina biek dute Txapeldunen Ligako txartela poltsikoan eta ezin dute liga irabazi. Gainera, bi taldeek Europako txapelketak jolastu behar dituzte abuztuan, pandemia dela eta atzeratu baitziren. Litekeena da datorren hilabeteari begira egotea eta jokalari garrantzitsuenak gordetzea.
