Antonia Delaere hegalaria fitxatu du Ibaeta Basketek
Antonia Delaere Belgikako selekzioarekin jokatzen. (Argazkia: FIBA) Ibaeta Basketek Antonia Delaere hegaleko jokalari belgikarra fitxatu du. 26 urteko jokalaria Frantziako ligako Nantes Rese Basket taldetik dator, ligan azken postuan geratu ostean. Fitxaketa honekin Mehryn Kraker hegalari estatubatuarrak utzitako zuloa bete du, talde donostiarrarekin zuen kontratua deuseztatu baitu. Wisconsingo jokalariak ekainean berritu zuen kontratua Ibaeta Basketekin, baina kontratua bertan behera utzi du bere unibertsitateko taldearen staff bezala lan egiteko.
Ibaeta Basketek fitxaketa ugari egin ditu irailean hasiko den 2020/2021 denboraldiari aurre egiteko, eta taldeko beste hainbat jokalarik kontratua berritu dute. Ane Muguruza entrenatzailea izan zen kontratua berritzen lehenengo pertsona, eta Lara Gonzalez etorri zen gero. Laura Garciak ekainaren lehenean berritu zuen kontratua, eta hortik hiru egunera Maria Eraunzetamurgilek luzatu zuen Ibaeta Basketekin harremana. Joyce Cousseins-Smith eta Toch Sarre izan ziren kontratua berritzen azken jokalariak.
Meya Tirera Maliko jokalaria izan da denboraldi berrirako Ibaeta Basketek fitxatu duen lehena, Valentziako saskibaloi taldearekin kontratua amaitu ostean. Ondoren, talde donostiarrak Julia Gladkova hegalari errusiarra fitxatu zuen Bembibre Emakumeen Lehen Mailako azken sailkatutik. Ane Esnal 19 urteko antolatzailea izan zen hurrengo fitxaketa, Amerikako Estatu Batuetako Eastern Wyoming College unibertsitateko taldean ibili ostean. Mariam Coulibaly izan zen Delaeren fitxaketaren aurrekoa, Frantziako ligako Landerneau taldean ibili ostean.
Irailaren 19an emango dio hasiera Ibaeta Basketek 2020/2021 denboraldiari, eta Bembibreren aurka jokatuko du lehen partida Leonen. 2019/2020 denboraldiko liga bertan behera gelditu zen pandemia dela eta, baina talde donostiarrak hamaikagarren amaitu zuen.
Delaereren zenbakiak
Joan den denboraldian bataz beste 13,6 puntu saskiratu zituen Antonia Delaerek Nanteseko taldearekin. Bataz besteko asistentziak eta erreboteak, aldiz, 3,7 eta 3,8 izan ziren, hurrenez hurren. 26 urteko jokalaria Belgikako selekzioko jokalari garrantzitsua bihurtzen ari da, 2017ko Europako txapelketan brontzezko domina lortu ostean. Horrez gain, hirutan irabazi du Belgikako liga (2017, 2018 eta 2019), eta beste hirutan Belgikako kopa (2016, 2018 eta 2019).
