Tabakalerak egitarau berezia izango du ostiralean eta larunbatean, bere bosgarren urteurrena dela eta
Egitarauaren aurkezpen prentsa aurrekoa, gaur goizean. (Argazkia: Tabakalera) Tabakalerak bost urte betetzen ditu ostiralean, eta kultura garaikideko zentroak egitarau zabala prestatu du irailaren 11erako eta 12rako urteurrena ospatzeko, arte garaikideari, zinemari eta musikari lotua. Gainera, hainbat bisita gidatu antolatu dituzte Tabakalerako sail desberdinak ezagutu ahal izateko.
Arte garaikideari dagokionez, Supraspectives Quadrature Berlineko artista-bikotearen instalazioa bisitatu ahal izango da urriaren 11ra arte, “ikerketa artistikoa datuetan eta esperimentazio fisikoan” oinarritua dagoena. Gainera, Nestor Basterretxea. Argazkigintzaren bitartez erakusketa ere ikusteko aukera izango da. Eskultorearen izena daraman plazan José Antonio Sistiaga zinemagile donostiarraren “ere erera baleibu izik subua aruaren…” film luzea proiektatuko dute 21:00etatik 0:00etara. Soinurik ez duen koloretako filma da, 1968 eta 1970 bitartekoa. Era berean, Zin Ex. Abstrakziotik algoritmora erakusketa estreinatuko du Tabakalerak asteburuan. Honetan ere, Sistiagaren lanak daude. Izan ere, erakusketa honetan “abangoardiako zinema, ordenagailuz sortutako artea eta 60ko eta 70eko hamarkadetan ekoitzitako bideoartea” ikus daiteke.
Zinemari dagokionez, hiru film ikusi ahal izango dira ostiralean eta larunbatean. Batetik, Oscar saria irabazi duen Parasite filma emango dute, haren txuri-beltzeko bertsioaren estreinaldian. Bestetik, Handia ikusi ahal izango da, eta haren aurkezpenean filmaren zuzendariak egoteaz gain, Paco Etxeberria eta Lourdes Herrasti Altzoko Handiaren gorpuzkinen behaketan aritu diren adituek parte hartuko dute. Azkenik, George Lucasen THX 1138 zientzia-fikzioko filma ikusteko aukera izango da, Güiro Meets Russia bikoteak zuzeneko musika eskaintzen duen bitartean.
Aipatutakoez gain, Tabakalera ezagutzeko bisita gidatuen egitarau zabala prestatu dute. Besteak beste, Edurne Ormazabal Tabakalerako zuzendari nagusiak, Jose Luis Rebordinos Zinemaldiko zuzendariak eta Jon Montero arkitektoak eskainiko dituzte. Kontzerturen bat edo beste, baita esku-hartze artistiko batzuk ere izango dira.
Bosgarren urteurreneko bisita gidatuen, filmen proiekzioen, musikaren eta bestelako jardueren egitaraua hemen ikus daiteke:
Irailak 10, osteguna
- 19:00. Ekitaldi instituzionala eta Kuboaren aurkezpena Julio Le Parc artistarekin. (ONLINE)
Irailak 11, ostirala
- 18:00-19:30. Elkarrizketa: Julio Le Parc eta Ana Longoni (ONLINE)
- 20:00-20:30. Zin Ex. Abstrakziotik algoritmora erakusketaren aurkezpena (ONLINE)
- 22:00. Parasite (Bong Joon-ho, Hego Korea, 2019, 132′) zuri-beltzeko bertsioaren estreinaldia.
Irailak 12, larunbata
- 10:00-11:15. Tabakalera ezagutu: 2deo eta EQZE. Bisita gidatua.
- 10:30-12:00. Tabakalera ezagutu: Jon Montero arkitektoarekin. Bisita gidatua.
- 11:00-12:15. Tabakalera ezagutu: sortzaileentzako baliabideak. Bisita gidatua.
- 11:30-13:00. Tabakalera ezagutu: memoria eta Kearen artxibogileak. Hitzaldia.
- 12:00-13:15. Tabakalera ezagutu: Euskadiko Filmategia. Bisita gidatua.
- 12:00-12:45. Elkarrizketa: Florian Wüst eta Oier Etxeberria Zin Ex. Abstrakziotik algoritmora erakusketaren inguruan. (ONLINE)
- 12:30-13:30. Tabakalera ezagutu: Edurne Ormazabal zuzendariarekin. Bisita gidatua.
- 13:00. Donostia Hiriko Kutxa Literatura Sarien 55. Edizioko irabazleak
- 16:00-16:45. Kameleoiak gara! Arte biziak: Sableak. Familientzako jarduera. (ONLINE)
- 16:30-18:00. Tabakalera ezagutu: J.L. Rebordinos (Donostia Zinemaldiko zuzendaria). Bisita gidatua.
- 17:00-18:30. Tabakalera ezagutu: Medialab. Bisita gidatua.
- 17:00-17:45. Hiru urtez goitik begira. Malas madres-i agurra. Elkarrizketa. (ONLINE)
- 17:30-18:30. Tabakalera ezagutu: LABe. Bisita gidatua.
- 18:00-19:30. Tabakalera ezagutu: Dr. Camino liburutegia. Bisita gidatua.
- 18:00-18:45. Artea eta zientzia solasaldia: Quadrature + Silvia Bonoli eta Raúl Angulo (DIPC). (ONLINE)
- 19:00. Handia filma. Gonbidatuak: Lourdes Herrasti, Paco Etxeberria, Aitor Arregi eta Jon Garaño. (ONLINE)
- 19:45-20:00. Ars Electronica Festival konexioa (ONLINE)
- 20:30-22:00. Kutxa Kontzertuak: Ghost Number. Zuzeneko musika.
- 22:30. THX 1138 filma, Güiro meets Russiaren zuzeneko musikarekin.
