Donostiako sorosleek 1.248 aldiz eskaini dute laguntza hondartza denboraldian zehar
(Argazkia: Joseba Parron) 
Hondartza denboraldia asteartean amaitu zen, eta hiru hondartzetako eta Santa Klara uharteko sorospen zerbitzuek denboraldiko balantzea egin dute. Guztira, 1.248 aldiz eskaini behar izan dute laguntza, eta hildako bat egon da.
Kontxako hondartzan 340 aldiz lagundu dituzte herritarrak; hauek dira nabarmenenak: hamabost aldiz anemona ziztadengatik 90 aldiz xabiroi ziztadengatik, sei aldiz marmoka ziztadengatik, 29 aldiz intsektuen ziztadengatik, hogei aldiz anbulantzia joan behar izan da eta 29 erreskate egin dituzte, gehienak ur motorrarekin galerna egunetan. Bestalde, aipatu hildakoa Kontxako hondartzan hil zen.
Ondarretako hondartzari eta Santa Klara uharteari dagokienez, sorospen zerbitzu beraren barruan zenbatzen dituzte jarduketak, eta sorosleek guztira 535 aldiz eskaini dute laguntza. Besteak beste, honako arrazoi hauengatik eman behar izan dute laguntza: 22 xabiroi ziztada, bost marmoka ziztada, 35 erreskate (kasu honetan ere, gehienak ur motorrarekin, galerna egunetan) eta hamahiru aldiz anbulantzia joan behar izan da.
Zurriolaren kasuan, 373 jarduketa egin dituzte, besteak beste, 168 xabiroi ziztada, zortzi marmoka ziztada, hamar intsektu ziztada, 57 erreskate (aurreko bi kasuen moduan, gehienak galerna egunetan, ur motorrarekin) eta anbulantzia 26 aldiz joan behar izan da.
