Elias Kerejeta Zinema Eskolak hamasei herrialdetako ikasleak izango ditu bere hirugarren promozioan
Elias Kerejeta Zinema Eskolako ikasturte berriko aurkezpena. (Argazkia: Gipuzkoako Foru Aldundia) 
Elias Kerejeta Zinema Eskolako ikasturte berria atzo, hilaren 15ean, hasi zen, eta COVID-19aren aurrean, irakaskuntza dualeko programa prestatu dute. Ongietorria egin diete hirugarren promozioko ikasleei, eta hamasei herrialdetako 44 ikasle izango dituzte; 27 emakume eta hamazazpi gizon. Ikasleen batez besteko adina 30 urtekoa da, eta bost Euskal Autonomia Erkidegokoak dira, hamabost Espainiako Estatuko beste erkidegoetakoak, eta beste 24en artean Argentina, Brasil, Txile, Kolonbia, Kuba, Ekuador, Amerikako Estatu Batuak, Holanda, Hungaria, Mexiko, Peru, Portugal, Erresuma Batua, Suitza eta Uruguai herrialdeetako ikasleak daude. Ikasturtea hamabost hilabete barru amaituko da, 2021eko abenduan, ikasleen lanen aurkezpenekin.
Ikasturtea 68. Zinemaldiaren atarian hasi da, bigarren promozioko eta promozio berriko ikasleek jarduera bereziak egingo baitituzte Zinemaldian: proiekzioetara joango dira, eskola magistraletan parte hartuko dute, Nest Zinema Ikasleen Nazioarteko Topaketan eta Zinemaldia barrutik ezagutzeko aukera ere izango dute. Hilaren 28an, Zinemaldia bukatzean, ohiko eskolekin hasiko dira. Harkaitz Millan Gipuzkoako Foru Aldundiko Kultura diputatuak ikasle berrien jatorri aniztasuna nabarmendu du: “Ezaugarri horrek bereizten eta balio erantsiz betetzen du eskola. Tabakaleraren eraikinaren bosgarren urteurrena ospatu berri dugu, eta egun gutxi barru Donostiako Zinemaldiaren edizio berria hasiko dugu. Lehen promozioko ikasle batek, Marina Palaciok, lehen filma estreinatuko du Zabaltegi-Tabakaleran; beste batek, Jaume Claretek, gauza bera egingo du Donostiako Zinemaldiko film laburren Nest Film Students lehiaketan”. Irakaskuntza dualak klase presentzialak eta telematikoak uztartuko ditu, eta hiru fasetan egingo dute.
