Haurtxoko eta gaztelekuen murrizketen aurkako sinadurak bilduko dituzte
Donostiako haurtxoko eta gaztelekuetako eta Martuteneko Etxarriene zentroko langileen joan den asteko elkarretaratzea, Alderdi Ederren. (Argazkia: Irati Salsamendi Lozano) 
Udalak Donostiako haurtxoko eta gaztelekuetan eta Martuteneko Etxarriene zentroan egindako murrizketen aurkako sinadura bilketa egingo dute langileek. Sinadurak bi egunetan bilduko dituzte: gaur, hilak 16, Bidebieta parkean izango dira, eta bihar, hilak 17, Groseko Katalunia plazan; bi kasuetan, 17:00etatik 19:00etara egongo dira.
Langileak haserre daude, udalak murrizketa handiak egin baititu euren zerbitzuan; aurrekontua %40 murriztu du, lanpostu batzuk kolokan daude eta langileek oraindik ez dakite noiz hasiko diren lanean. Era berean, udalari bilera bat eskatu diote, baina ez dute erantzunik jaso. Hedabide honek zerbitzu horretako bi langilerekin hitz egin zuen joan den astean, eta erreportaje bat osatu zuen.
