Dxusturi teatroren 'Lakoste' antzezlanak irabazi du 2021ko Poltsiko Antzerki Sorkuntzako lehen saria
(Argazkia: Donostia Kultura) Antzerki eta sorkuntza txikiak euskaraz bultzatzeko sortu zuten Poltsiko Antzerki Sorkuntza programa eta 2021eko edizioak baditu bere sarituak. Dxusturi teatroaren Lakoste antzezlanak eskuratu du lehen saria , eta bigarrena, berriz, Zutani teatroaren Bete ingoiau lanak.
Dxusturi teatrok Lakoste antzezlana ekoizteko eta garatzeko 4.000 euroko diru-laguntza jasoko du. Zehazki, lanaren gidoilaria, zuzendaria eta aktorea Eneritz Artetxe da, eta hainbat galdera ditu oinarrian, hala nola “nola uztartu ama bakarra eta sortzaile izatea” eta “mundu distopiko honetan geratzen ote zaigu elkar zaintzarako eta maitasunerako tarterik”.
Bete ingoiau, berriz, Goiz Eder Iturain eta Esti Curielek sortu dute. Haiek dira aktoreak ere, eta Elena Irureta da zuzendaria. Protagonistak gasolindegi batean lan egiten duen bikote bat da. Egunerokotasunean bizi dituzten egoeraz nazkatuta daude, baina gutun batek hori guztia apurtuko die. Umore beltza eta absurdoko antzezlana da, eta 3.200 euroko diru laguntza jasoko du.
Bestalde, biak Poltsiko Antzerki Jaialdiaren 30. edizioan ikusi ahal izango dira, Donostiako taberna zein aretoetan egingo dena 2021ean.
