EH Bilduk salatu du udala murrizketa larriak egiten ari dela partida sozialetan
Zigor Etxeburua EH Bilduko zinegotzia, udan emandako prentsaurreko batean; gaur ere Etxeburuak eskaini du prentsaurrekoa. (Argazkia: Iñaut Gonzalez de Matauko Rada) 
Zigor Etxeburua EH Bilduko zinegotziak Donostiako Udaleko aurrekontuen balorazioa egiteko prentsaurrekoa eskaini du udaletxean, eta Eneko Goiaren gobernua “joera neoliberaleko” murrizketak egiten ari dela salatu du. Izan ere, Etxeburuak azpimarratu du Goiak pandemia garaian “aprobetxatu” egin duela “hainbat proiektu eta kolektiboei murrizketa zorrotzak egiteko”, beste proiektu batzuen planifikazioarekin aurrera jarraitzen duen bitartean: “Udal gobernuak lehentasunezkotzat jo dituen proiektuen artean, obra publiko handira bideratutako partida miliodunak nabarmendu behar dira. Izan ere, Eneko Goiak, udalak zuzenean sustatuko proiektuetan lan egiten duten enpresa eraikitzaileei diru publikoko milioiak ematen jarraitzeaz gain, metroaren igarobidearen (40 milioi euro gainkostu berrietan) eta Atotxako AHT geltokiaren (80 milioi euro) lanei baldintzarik gabeko babesa erakutsi du publikoki”.
Ordea, udal gobernuak partida sozialetarako aurrekontua “zapaldu” duela nabarmendu du Etxeburuak: “Murrizketen artean, egitasmo sozialak, auzoetako ekonomia sustatzeko proiektuak eta euren irabazi asmorik gabeko lana egiten jarraitzeko diru-laguntza publikoak behar dituzten kolektiboei ezarritako murrizketak nabarmendu behar dira”. Era berean, krisi hau Goiaren gobernuaren “alderik neoliberalena” ateratzen ari dela azpimarratu du EH Bilduko zinegotziak: “Esan ohi da krisi garaietan bakoitzaren onena eta txarrena ateratzen ari dela, baina 2020ko aurrekontuen exekuzioa ikusita, argi dagoena da pandemia hau Donostiako EAJren eta PSEren alderik neoliberalena ateratzen ari dela”. Horregatik, zinegotziak azaldu du udal gobernuari azalpenak eskatuko dizkiotela, murrizketak zenbatekoak diren eta zein irizpideren arabera egin diren jakiteko: “Jakin nahi dugu zergatik Eneko Goiak gainkostuak pilatzen dituzten obra publiko erraldoiekin jarraitzea erabakitzen duen eta, aitzitik, zergatik ezartzen dituzten murrizketak gehien behar dutenak laguntzeko orduan”.
Hain justu, Etxeburuak adierazi du udalak hainbat arlotan egin dituela murrizketak: “Besteak beste, Ekialdeko barrutiko aurrekontu osoa geldiarazi dute, 2019koa (gauzatu gabe zegoen) eta 2020koa. Altza, Intxaurrondo eta Bidebieta dira hirian errenta gutxien dituzten eremuak, eta beraz, inbertsio gehien behar dituztenak, hiri orekatu bat izatea baldin bada helburua, noski. Horretaz gain, irabazi asmorik gabeko elkarteentzako laguntzetan %20 murriztu dute, Loiolako Erriberako Haur Eskola berri baten eraikuntza geldiarazi dute (600.000 euro), prozesu parte hartzailetzan adostutako egitasmoak, kirol klubei zuzendutako laguntzak (%20 gutxiago) eta udal gobernuak ez ditu gauzatuko EH Bildurekin 2020rako adostutako partidak: Matigotxotegi (380.000 euro) eta Pikabea-Oleta”.
