Enrique Ramosek Donostiako Udala utziko du Gipuzkoako Aldundira joateko
Ane Oiarbide eta Enrique Ramos. (Argazkia: Donostiako Sozialistak) 
1999tik Donostiako Udaleko PSE-EEren zinegotzi izan ostean, Enrique Ramosek udaleko ardurak utziko ditu. Gipuzkoako Foru Aldundiko Obra Hidraulikoen zuzendari kargua hartuko du Ramosek. Ane Oiarbidek ordezkatuko du, pasa den legealdian sozialisten udal taldeko zinegotzi izandakoak. Gaur egun, sozialisten aholkulari gisara dago udalean.
Gaur egun, Ramos Ekologia eta Osasun Publikoko zinegotzia da, eta 2015-2019 legealdian Hirigintza zinegotzia izan zen. 1999tik 2015era bitarte ondorengo ordezkaritzak izan zituen udalean: Herri Partaidetza, Merkataritza, Ekonomia eta Enplegua, Herri Segurtasuna eta Turismoa.
