Haurrek ‘Altzoko Handia’-ren bidez ezagutu dezakete San Telmo Museoa
Koronabirusa dela eta, 2020/2021 ikasturtean San Telmo Museoak ez ditu familientzako ohiko ikastaroak antolatuko. Horren ordez, museoaz modu autonomoan gozatzeko familientzako proposamenak egingo ditu, jokoen eta eskulanen bitartez, besteak beste. Asteburu honetan, Miguel Joaquin Eleizegi Altzoko Handia-k gidatuko ditu haurrak museotik, hala nola erakusketa iraunkorrean duen txokoa erakutsiz. Jarduera egiteko materiala gaurtik aurrera doan eskuratu daiteke museoaren webgunean, euskaraz eta gaztelaniaz.
Hain justu, museoaren erakusketa iraunkorrean Eleizegiren hainbat objektu daude, hala nola, kapela, eskularruak eta aulkia. Hedabide honek gaia aztertu zuen duela gutxi, Atzera Begira atalean.
