Realak segida eman nahi dio etxetik kanpoko bolada onari
(Argazkia: Reala) 
Bi asteko atsedenaldiaren ostean, asteburu honetan berriz ere mutilen futboleko liga itzuliko da eta Realak Cadizera bidaiatuko du. Sasoi honetan, etxetik kanpo ez dute partida bat ere galdu txuri-urdinek; azkeneko lau norgehiagokak irabazi dituzte eta bat bakarrik berdindu dute. Oro har, Ligan emaitza onak lortzen ari da Reala, eta igandean, Cadizen kontra, bolada onari segida eman nahi dio Imanol Alguacilek. “Hasiera ona izan da, baina bide beretik jarraitu nahi dugu”, adierazi du Oriokoak, baina horretarako “igandean irabazi behar” dutela.
Futbolarekin jarraituz, Realeko neskek Bartzelonaren kontra jokatuko dute. Espainiako ligako zein Europako talde onenetarikoa da Bartzelona une honetan, baina Natalia Arroyoren taldeak ere emaitza onak lortu ditu azkeneko partidatan; lautik hiru irabazi ditu. Entrenatzaileak nabarmendu du “talde ona” duela Realak, eta horrek “konfiantza” ematen diola. Jarraian lortzen duten hirugarren garaipena lortu nahi dute biharko partidan.
Eskubaloian, Bera Berak erronka garrantzitsu bati aurre egin beharko dio asteburuan. Europako Ligako bueltako partida jokatuko du Bidebietako taldeak, Zvezdaren kontra. Joaneko partidan berdinketa lortu ostean, Imanol Alvarezen taldeari garaipenak besterik ez dio balio, talde faserako sailkatu ahal izateko. Entrenatzaileak azpimarratu du taldearentzat “historiako partida garrantzitsuenetarikoa” dela, “multzoen fasean berriro egoteko aukera emango diguna”.
Saskibaloian, Gipuzkoa Basketek Joventut hartuko du. Marcelo Nicola entrenatzaileak orain arteko bolada txarrari buelta eman nahi dio, eta horretarako jarrera aldatzea ezinbestekoa dela nabarmendu du.
Belar hockeyan, Realak partida zaila du. Liderraren kontra jokatuko du, Club de Camporen kontra, alegia; Madrilgo taldeak bederatzi partidatatik zortzi irabazi ditu, eta aurtengo txapelketa guztiak irabazteko moduan dira.
Izotz Hockeyan, Txuri Urdineko neskek Milenio Panthersen kontra jokatuko dute. Aurreko asteburuko partida onaren ostean, berriz ere garaipena lortu nahi dute donostiarrek. Une honetan, hirugarren dira ligan.
ESKUBALOIA
Europako Liga, talde faserako sailkapena, bueltako partida
Zvezda – Bera Bera (Igandea, 10:00 —Donostiako ordua—, 12:00 —Chekhoveko, Errusiako, ordua—)
SASKIBALOIA
Gizonezkoen lehen maila, 12. jardunaldia
Gipuzkoa Basket – Joventut (Igandea, 12:30)
FUTBOLA
Emakumezkoen lehen maila, 10. jardunaldia
Bartzelona – Reala (Larunbata, 12:00)
Gizonezkoen lehen maila, 10. jardunaldia
Cadiz – Reala (Igandea, 16:15)
BELAR HOCKEYA
Emakumezkoen lehen maila, 9. jardunaldia
Reala – Club de Campo (Igandea, 11:00)
IZOTZ HOGKEYA
Emakumezkoen lehen maila, 9. jardunaldia
Milenio Panthers – Txuri Urdin (Larunbata, 13:55)
