Europa Ligan aurrera egiteko partida garrantzitsua du Realak
(Argazkia: Reala) Europa Ligako bigarren buelta hasiko du Realak. Herbeheretaraino bidaiatu du Imanol Alguacilen taldeak, eta AZ Alkmaar izango du aurrean, liderra.
Realak bi partida irabazi ditu Europa Ligan, AZ Alkmaarren eta Rijekaren kontra, eta bakar bat galdu du, Napoliren aurka. Hala ere, txuri-urdinak hirugarren dira F taldean, AZ Alkmaarren eta Napoliren —bigarrena— puntu berdinak baditu ere. Horregatik, final-hamaseirenetarako sailkatzeko aukerak izateko, oso garrantzitsua izango da partida honetan garaipena lortzea.
AZ Alkmaarren kontrako joaneko partidan, joko ona egin zuten txuri-urdinek eta ondo gainditu zuten aurkaria, 1 eta 0 irabaziz. Hala ere, oraingoan David Silva gabe egin beharko dio aurre Herbeeretako taldeari. Kanariar Uharteetako jokalaria igandeko partidan lesionatu zen, eta ezingo du jokatu bi astez. Silva oinarrizko jokalaria da, baina aukera onak ditu Imanol Alguacilek beste bide batzuk topatzeko ere. Talde indartsua du Realak aurten.
