Becca Hittner AEBetako jokalaria aurkeztu du Ibaeta Basketek
Becca Hittner Azu Muguruza entrenatzailearekin, atzoko aurkezpenean.
(Argazkia: Ibaeta Basket) Ibaeta Basketek Becca Hittner fitxatu du, eta atzo aurkeztu zuten Jose Antonio Gascan. “Oso pozik nago, hiria oso polita da, taldea oso ona da eta banekien aukera ona zela niretzat”, nabarmendu du AEBetako jokalariak. Hittnerrek unibertsitate-ligan jokatu du batik bat, Drake Unibertsitatearekin, eta sasoi honetan aritu da estreinakoz Espainiako ligan, Al-Qázeres Extremadura taldean. Honekin, 14 partidatan, 6,9 puntu eskuratu ditu, eta 3,1 errebote, 25 minututan. Estreinako partida larunbatean izango du, Bembibreren kontra: “larunbatean jokatzeko irrikaz nago. [..] Kantxara aterako naiz, eta taldeari laguntzeko dagokidana egingo dut”.
AEBetako jokalaria Julia Gladkovaren ordez iritsi da Ibaeta Basketera. Izan ere, Errusiako hegaleko jokalariak taldea utzi zuen asteburuan, taldearekin adostuta.
