Sufrituta, baina Realak aurrera egin du kopan
Isakek egin du lehenengo gola. (Argazkia: Reala) 
Reala kopako final-zortzirenetan izango da, Leganesen aurkako final-hamaseirenetako kanporaketa 2-3 irabazita. Reala zen faboritoa, eta kanporaketa bideratuta izan du neurketaren zati handi batean, baina azkenean sufrituta gainditu du talde madrildarra.
Isakek egin du lehenengo gola, jokaldi on baten ostean, atezaina maisuki gaindituta, 8. minutuan. Hortik aurrera, oso eroso aritu da Imanol Alguacilen taldea zelaian, eta Oiartzabalek egin du bigarren, 43. minutuan. Olasagastik pase bikain bat egin dio kapitainari, eta honek erraz gainditu du Leganeseko atezaina.
Bigarren zatian, aldiz, gogotsu zelairatu da Leganes, eta neurketa berdintzea lortu du, Juan Muñozen bi golekin. 60. minutuan eta 70. minutuan sartu ditu golak Muñozek, eta partidari buelta eman dio.
Urduritasuna nagusitu da zale txuri-urdinen artean, baina pixka bat lasaitu dira 73. minutuan, Leganeseko atzelari batek Oiartzabal zapaldu baitu area barruan, eta Mateu Lahoz epaileak penaltia adierazi du. Kapitainak berak jaurti du, Reala berriz ere markagailuan aurreratzea lortuz. Hortik aurrera, Reala jokoa geldiarazten saiatu da, eta Leganesek berdinketa lortzeko aukeraren bat izan badu ere, garaipena donostiarrena izan da.
