Danborrada bertan behera uztea erabaki dute
2020ko San Sebastian eguna, Antiguan. (Argazkia: Iñaki Agirre) 
Iritsi da espero zen erabakia: Donostiako Udalak danborrada bertan behera uztea erabaki du, helduen zein haurren danborradetako ordezkariekin bildu ostean. Hasiera batean, udala astelehenean zen erabakia hartzekoa, baina danborradetako ordezkariek hala eskatuta, gaur bildu dira azkenean, eta aipatu erabakia hartu dute. Eneko Goia alkateak adierazi du erabakia “zaila, baina osasun arloan beharrezkoa” izan dela. Era berean, udalak azaldu du ez duela bandera igoerarik ez jaitsierarik antolatuko, ezta haur danborradan Alderdi Ederren egin ohi den ekitaldi jendetsua eta erdialdeko kaleetatik egin ohi diren desfileak ere.
Hala ere, udalak ohar bidez jakinarazi du haur danborradako konpainiek “ohikoa ez den formatu batean” desfilatu ahalko dutela, nahi izanez gero. Formatu ezohiko horren nondik norakoak datorren astean erabakiko dituzte, haur danborradetako ordezkariekin batera. Bestalde, udalak helduen zein haurren danborradetako ordezkariei adierazi die “ekitaldi sinbolikoren bat” egiteko aukera aztertzen ari dela. Udalak honakoa azaldu du oharrean: “Udalak mahai gainean dituen hainbat proposamen aztertuko ditu eta hurrengo astean jakinaraziko du hiriko patroia omentzeko egunean ekitaldirik egingo duen ala ez”.
Eneko Goia alkatea eta Jon Insausti Jaietako zinegotzia, helduen danborradetako ordezkariekin, udaletxean. (Argazkia: Donostiako Udala)
Urrian danborrada antolatzeko erabakia hartu ostean, koronabirusaren kutsatzeen gorakadak erabaki hori kolokan jarri du azken asteotan, beste hainbat ekitaldi bertan behera gelditzen joan baitira, esaterako, San Tomas eguneko azoka. Horrela, bigarren urtez jarraian, Donostiak ezingo du bere egunik handiena bere horretan ospatu. Azken astean, hainbat izan dira erabakira aurreratu diren konpainiak, parte hartuko ez zutela iragarrita.
Urrezko Danborra eta dominak
Danborrada bertan behera utzita ere, udalak argitu du Urrezko Danborra eta Hiritar Merezimenduaren Dominak emateko ekitaldiak modu berean antolatuko dituela: hilaren 19ko arratsaldean egingo dute dominen banaketa eta hilaren 20ko eguerdian Urrezko Danborrarena. Era berean, udala aztertzen ari da ekitaldi horiek udaletxetik kanpo egiteko aukera, edukiera handiagoa izateko.
Udaleko ordezkariak, haur danborradako konpainietako ordezkariekin bilduta. (Argazkia: Donostiako Udala)
