Realak Atletico Madrilen aurka jokatuko du kopan
(Argazkia: Reala) 
Realak dagoeneko badaki zeinen aurka jokatuko duen Espainiako Kopako final zortzirenetan: Atletico Madril taldearen aurka. Eguerdian egin dute zozketa Madrilen, eta talde txuri-urdinari txapelketako talde onenetako bat egokitu zaio.
Kanporaketa partida bakarrera jokatuko da, eta Anoetan izango da, hilaren 19an edo 20an, San Sebastian egunaren bueltan. Realak ligako partida bat zuen hilaren 20an Anoetan; Mallorcaren aurkakoa, hain zuzen ere. Ordea, Atletico Madrilek hilaren 15eko asteburuan Espainiako Superkopa jokatuko duenez Saudi Arabian, kopako kanporaketa astean zehar jokatu beharko dute, hilaren 19an edo 20an, alegia. Beraz, txuri-urdinek Mallorcaren aurkako neurketa egunez aldatu beharko dute.
Imanol Alguacilen taldeak Panaderia Pulido taldearen aurka jokatu zuen 2021-2022ko denboraldiko lehenengo kanporaketa, eta aise irabazi zuen: 0-4. Hurrengoa ere erraz gainditu zuen, Zamoraren aurka: 0-3. Final hamaseirenetako neurketa asteazkenean jokatu zuen, eta bukaeran sufrituta irabazi zuen, 2-3.
