Big Bob Railroad taldeak 'Itxoiten' abestiaren bideoklipa estreinatu du
Big Bob Railroad taldearen 'Itxoiten' abestiaren bideoklipa. (Argazkia: Big Bob Railroad) 
Big Bob Railroad blues eta folk bikote donostiarrak 1, 2, Swamp! EPa argitaratu zuen abenduan, eta diskoko lehenengo abestiko bideoklipa argitaratu du orain: Itxoiten. “Abestiak Big Bob hartzaren etxolaren portxera garamatza, berehalako asebetetzearen etengabeko bilaketa girotzen digun bitartean”, azaldu du taldeak.
Aitor Ibarguren gitarra eta perkusio jotzaileak eta Josu Etxeberria perkusio jotzaile eta abeslariak 2016an sortutako taldea da Big Bob Railroad, eta Mississippi ibaiko (AEB) deltako blues estiloa jotzen du bikoteak, euskarazko euren ukitu propioa emanez. 2018an argitaratu zuten euren lehenengo diskoa, Session I, eta 2019an bigarrena, Session II. 1, 2, Swamp! euren hirugarren lana da, beraz. Itxoiten abestian Nagore Etxabek hartu du parte perkusio jotzaile gisa, Unai de Andres aritu da ekoizpen eta grabaketa lanetan, eta Aitor Carrasquedo materingean.
Diskoaren kopia fisiko gutxi batzuk ere egin dituzte, pakete berezi batekin. Hain zuzen ere, kartoizko azala eta apaingarria jarri diote eta CDa Jabier Rodriguezen azalean oinarrituta serigrafiatu dute. Kontzertuetan saltzeko asmoa dute, baina momentuz ez dute diskoaren aurkezpen kontzerturik iragarri, eta beraz, diskoa eskuratu nahi izanez gero, sare sozialen bidez beraiekin harremanetan jarri daiteke.
