Ramon Diaz omendu dute Loiolan
Loiolatarra elkartearen ondoan egin diote omenaldia Ramon Diazi. (Argazkia: Beñat Parra) 
21 urte bete dira ETAk Ramon Diaz itsas komandantziako sukaldaria hil zuenetik, eta urteroko legez, omenaldia egin diote Loiolan, bere auzoan. Goizean goiz egin zuten Diazen aurkako atentatua, eta horregatik, 08:00etan egin diote omenaldia, Aralar mendia kalean, Loiolatarra elkartearen ondoan, elkarte horretako bazkide baitzen Diaz. Haren omenezko plaka bat dago hor, eta bertan egin dute omenaldia, Diazen argazki handi bat eta lore zein kandela ugari jarriz. Udaleko zenbait ordezkari, kargu militar batzuk eta Loiolako hainbat bizilagun egon dira omenaldian, eta minutu bateko isilunea egin dute, ondoren txalo artean ekitaldia amaitzeko.
Ramon Diazen argazki handi bat eta lore ugari jarri dituzte, haren omenezko plakaren azpian. (Argazkia: Beñat Parra)
Salamancakoa izatez, Loiolako bizilaguna zen Diaz, eta Donostiako itsas komandantzian lan egiten zuen sukaldari gisa, baita Loiolatarra elkartean ere. Talde armatuak lehergailu bat jarri zion autoaren azpian, eta lanera abiatu zenean lehertu zen. Diazen heriotzaz gain, inguruan zeuden bost pertsona zauritu zituen eztandak.
Udaleko hainbat ordezkari, Loiolako hainbat herritar eta kargu militar batzuk izan dira Ramon Diazen omenaldian. (Argazkia: Beñat Parra)
