Minbiziari lotutako zahartze molekularraren inguruko hitzaldia Tabakaleran
Maria Blasco doktorea. (Argazkia: DIPC) Maria Blasco doktoreak Gaixotasunen jatorria hitzaldia emango du otsailaren 4an Tabakaleran. Doktoreak minbiziari lotutako zahartze molekularraren inguruan egindako ikerketa zabalaren emaitza garrantzitsuenak aurkeztuko ditu.
Blasco biologo molekularra da, eta Ikerketa Onkologikoen Zentro Nazionaleko zuzendari zientifikoa. Zinema eta Zientzia V. Zikloaren barruan gonbidatu dute. Euskadiko Filmategiak, Donostia International Physics Center-ek (DIPC) eta Donostia Zinemaldiak antolatuta, Maria Sødahl zuzendari norvegiarraren Hope pelikula aurkeztuko du, zeinak minbizia terminala diagnostikatzen zaion emakume baten istorioa kontatzen duen.
Doktorearen iritziz, azken urteetan minbiziaren inguruko paradigma aldatu egin da: “Lehen uste zen gaixotasunei buruzko ikerketa independenteak gaixotasun bakoitzerako tratamendu espezifikoak eta eraginkorrak garatzea ekar zezakeela. Gaur egun badakigu gaixotasunaren karga handitzen ari dela, batez ere biztanleria zahartzen ari delako. Beraz, gaixotasunaren agerpena murriztu edo atzeratu nahi badugu, prozesu horri ekin behar diogu”.
Zahartze-molekularraren forma aztertuenetako bat telomeroen laburtzea da, gure kromosomen amaieran dauden babes egiturak. “Gure telomeroen higatzeko abiadura faktore genetikoen eta ingurumen faktoreen araberakoa da. Nire ikerketa-taldea aitzindaria izan da frogatzen prozesu molekular horren atzeratzeak, zahartze prozesua eta gaixotasunen agerraldia ere atzeratu ditzakeela”, azaldu du Blascok.
Telomeroek eta telomerasak minbizian eta zahartzean duten rola aztertzen aditua da Maria Blasco. Bere taldearekin lortu dituen emaitzak zientzia-aldizkari garrantzitsuenetan argitaratu dira, besteak beste, Cell, Nature eta Science aldizkarietan. Hainbat sari ospetsu ere jaso ditu doktoreak:Suitzako Josef Steiner Cancer Ikerketa Saria, Alemaniako Körber European Science Saria, Biologia Molekularreko Europako Erakundearen Urrezko Domina (EMBO), Santiago Ramon y Cajal Biologiako Sari Nazionala eta Jaime I.a Erregearen Saria, beste batzuen artean.
Hitzaldira joateko izen ematea, DIPCren webgunean egin behar da. Horrez gain, YouTubeko kanalean ikusi ahalko da. Hitzaldia 17:30an izango da Tabakalerako Z aretoan.
