Realak agur esan dio Europari
Rafael 'Rafinha', Leipzigeko jokalariz inguratuta. (Argazkia: Reala) 
Realari handi geratzen zaizkio Europako kanporaketa garrantzitsuak. Hori da, behintzat, ostegunean Anoetan ikusi zena, Imanol Alguacilen taldea, bigarren zatiko hogei bat minututan kenduta, ez baitzen gai izan neurketa osoan talde alemanari aurre egiteko.
Lehenengo zati osoan, txuri-urdinek ez zuten gol aukera bat bera ere sortu, are gehiago, ez zuten arriskua sortu Leipzigen zelaian. Alemanak, aldiz, nagusi izan ziren jokoan, eta gol aukera batzuk sortu zituzten, Ryan atezainak salbatu behar izan zituenak. Lehenengo zatiaren amaieran, ordea, Ryanek penaltia egin zion Leipzigeko jokalari bati, eta ondoren penaltiaren jaurtiketa gelditu bazuen ere, Orban Realeko jokalari guztiak baino lehenago iritsi zen errebotera, eta 0-1-ekoa egin zuen.
Bigarren zatia lehenengoaren antzera hasi zen, Leipzig nagusi. Reala zertxobait gehiago gerturatzen ari zen alemanen areara, baina arrisku handirik sortu gabe. Horrela, Oiartzabalek baloia galdu zuen zelai erdian 59. minutuan, eta, kontra erasoan, Andre Silvak bigarrena sartu zuen, jaurtiketa indartsu baten bidez.
Dena galduta zegoela zirudien, baina Alguacilek Januzaj eta Silva zelairatu zituen, eta, bereziki Januzajen bidez, arrisku gehiago sortzen hasi ziren txuri-urdinak. Hain zuzen ere, Januzajek falta bat erdiratu zuen 65. minutuan, eta Zubimendik gola egin zuen. Hasieran jokoz kanpokoa adierazi zuen epaileak, baina VAR teknologia tarteko, azkenean gola legala zela adierazi zuen. Anoetan zoramena sortu zen, eta zaleen babesarekin, jokalariak berdinketaren golaren bila joan ziren etengabe hurrengo hogei minutuetan. Januzajek ia faltaz sartu zuen, eta Isakek eta Sorlothek aukera bana izan zuten, baina ez zuten asmatu.
Berdinketa gertu zegoela zirudien, baina Sorlothek bere gol aukera huts egin eta gutxira, 87. minutuan, Leipzigen aurkako penaltia adierazi zuen epaileak, Aritz Elustondok baloia eskuarekin ukitu zuelako. Forsbergek bota zuen, eta Ryanek aldea asmatu bazuen ere, ezin izan zuen gelditu. 1-3-koa zen, eta partida galduta zegoen. Bost minutu gehitu zituen epaileak, baina Realak ezin izan zuen askoz gehiago egin, Europa ligatik kanpo gelditu zen.
