Airearen kutsadurak gora egin du Saharako basamortuko hautsa dela eta
Donostian pm10 partikulen maila altua espero da bai gaur, bai bihar.
Kutsadura neurtzeko Eusko Jaurlaritzaren estazioa, Amaran. (Argazkia: Hitza) 
Eusko Jaurlaritzaren Airearen Kalitatearen Kontrolerako Sareak jakinarazi du osasunarentzat kaltegarriak diren partikulen kontzentrazioa areagotzen ari dela Iberiar penintsula osora Saharako basamortutik sartutako hautsa dela eta. Saharako intrusioak iragartzen dituzten hainbat modeloren arabera, maila horiek behera egingo dute martxoaren 16aren azken orduetan, hau da, asteazken gauean. Beraz, Donostian pm10 partikulen maila altua espero da bai gaur, bai bihar.
Hori dela eta, hurrengo bi egunetan aire zabalean esfortzu fisiko handiko jarduerarik ez egitea gomendatzen da.
Gainera, ahal den heinean, auto partikularrak erabili beharrean garraio publikoa erabiltzea gomendatzen da. Izan ere, autoek partikula mailak igotzen baitituzte.
Bestalde, talde sentiberei, bereziki kanpoan esfortzu fisiko handiak ekiditeko eskatzen zaie. Talde horretan daude:
– Haurrak.
– Fisikoki aktiboak diren pertsona helduak, kasurako, aire zabalean eta denbora luzez jarduera fisikoa edo lana gogor egiten dutenak.
– Pertsona asmatikoak edo beste arnas arazoren bat dutenak, eta adinekoak.
Hurrengo, orduetan eta egunetan hirian neurtzen diren partikula mailen jarraipena egingo da eta iragarpenean aldaketarik balego jakitera emango litzateke.
