Emakumeei ahotsa emateko topaketa 'aitzindari' bat antolatu dute eraikuntza sektoreko erakundeek
Gipuzkoako Ganberan egingo da topaketa. 
‘Emakumeak eraikuntzan. Aldaketarako solasaldia’ izeneko “topaketa aitzindaria” antolatu dute Gipuzkoako eraikuntza sektoreko erakundeek emakume “ikusezinei” ahotsa emateko asmoz. EHAEO, COAATG, EAGI eta ASCONGIk deituta, Donostian kokatuta dagoen Gipuzkoako Ganberan elkartuko dira bihar, 12:00etan. Egunero eraikuntzan lan egiten duten emakumeengan jarriko dute fokua, lehen aldiz publikoki beren bizipenak eta iritziak parteka ditzaten. Eraikuntza sektoreko erakundeek adierazi dutenez, “belaunaldi berriak inspiratzea eta berdintasunerako bidea eraikitzea da helburua”.
Bertan izango dira Aintzane Murillo, igeltseroa; Suany Soriano, erreforma-ofiziala; Ane Zabaleta, margolaria eta ekintzailea; Irati Izquierdo, obrako burua; Saioa Izaguirre, elektrizista; Juana Otxoa-Errarte, Gipuzkoako EHAEOren presidentea; Nagore Azuabarrena, GAATEOko presidentea; Txema Muñoz, ASCONGIko presidentea eta Claudia Pennese, arkitekto eta irakaslea.
