Erdialdean ura banatzeko sare nagusia berrituko dute
Udalak berritu egingo du Erdialdean ura banatzeko sare nagusia, eta hori gauzatzeko proiektua onartu berri dute, 722.981 euroko aurrekontuarekin. Proiektua adjudikatzen dutenean, enpresa adjudikaziodunak lau hilabeteko epea izango du lanak gauzatzeko.
Hain justu, Amarako deposituaren banaketa arteria nagusiaren zati bat berrituko dute, zehazki, Askatasunaren hiribideko 37. zenbakiaren eta Mirakruz kaleko 1.zenbakiaren arteko tartea, Santa Katalina zubitik ere pasatzen dena. Tarte jakinen bat eta aurretik berritu dituzten korapilo batzuk izan ezik. Berrituko duten tartea handia denez eta konexio asko dituenez, tarteka berritzea aurreikusi dute proiektuan, hiriko gune gutxiago uzteko zerbitzurik gabe. Eneko Goia alkateak nabarmendu du “oso beharrezkoa” dela hodi nagusi hori berritzea, gaur egungoak “100 urte” dituelako: “Ona atera zaigu, baina berritzeko garaia da”.
