Kontxako barandaren beste zati bat berrituko dute, azken-aurrena
Kontxako barandako lanak. (Argazkia: Donostiako Udala)Donostiako Udala 
Donostiako Udalak Kontxako barandaren beste zati bat berritzeko kontratazio espedientea onartu du, 793.672 euroko lizitazio aurrekontuarekin eta kontratua adjudikatzen dutenean, bost hilabetean gauzatzeko. Gutxi gorabehera, Errege Etxetik Antiguako tunelera doan 120 metroko zatian egingo dute esku hartzea, eta baranda berritzeaz gain, hondartzara ematen duen horma konpondu eta handitu egingo dute.
Eneko Goia alkateak gogorarazi du halako zenbait proiektu gauzatu dituztela dagoeneko, baranda konpontzeko prozesua “hainbat fasetan” erabaki zutelako hasieratik, suposatuko zuen “kostuarengatik”. Ildo horretatik, orain onartu dutena azken-aurrena dela nabarmendu du, eta gelditzen den zatia, 150 metrokoa, datorren urtean egitea aurreikusten dutela adierazi du.
