Korrikaren saio berezia egingo dute Irutxuloko Hitzak eta Euskadi Irratiak
Hilaren 10ean izango da programa, 11:30etik 13:00etara, Alderdi Ederretik zuzenean. Egun berean, hedabide honek Bidebietan hartuko du lekukoa HITZAkide batekin batera.
Irutxuloko Hitzak Erdialdean hartu zuen lekukoa, 2019an. 
Korrika badator, eta Irutxuloko Hitza prest dago hilaren 10erako. Izan ere, egun horretan bukatuko da Donostian 22. Korrika, eta egunaren jarraipen berezia egingo dugu webgunean eta sare sozialetan. Berritasun gisa, Euskadi Irratiarekin lankidetzan, zuzeneko saio berezia egingo dugu hilaren 10ean, Alderdi Ederren. Ordu eta erdi inguruko iraupena izango du, 11:30ean hasita.
Programa bereziak eguneko protagonistak eta askotariko konexioak izango ditu, eta Korrikaren bukaerako ekitaldia eskainiko du. Euskadi Irratiko Nagore Telleriak eta Irutxuloko Hitzako Inaxio Esnaola kazetariak gidatuko dute saioa.
HITZAkideekin batera
Korrikaren lekukoa HITZAkide batek eramango du gurekin batera, hilaren 10ean, Bidebietan, 12:00etatik aurrera. Jose Elosegi kalea eta Jose Sebastian Laboa kalea elkartzen diren puntuan izango da, Cesar Benito Futbol Zelaia pasata. HITZAkideen Txokoa atalean lekukoa eramateko zozketa abian jarri genuen martxoaren 28an, eta irabazlea dagoeneko ikus dezakezue txokoan bertan.
2019ko 21. Korrikan klika egin genuen Erdialdean. Ahaztezina izan zen. 18:20 inguruan hartu zuten lekukoa Nerea Lizarralde zuzendariak eta Igor Lopetegi Hitzakideak. 2069 kilometro zenbakian izan zen, Urbieta eta San Martin kaleek bat egiten duten tokian. Lankide eta lagunekin batera egin zuten kilometroa.
Jokoa abian da
Korrikaren inguruko joko bat antolatu dugu: Zenbat dakizu Korrikari buruz?. Korrikaren historiaren inguruko eta Korrikak Donostian urteetan zehar izandako esperientzien eta pasadizoen inguruko zortzi galdera erantzutean datza jokoak.
Parte hartzaile guztien artean Errigorako saski bat zozkatuko dugu. Parte hartzaileen artean HITZAkide diren horientzat zozketa propioa ere badugu dugu. HITZAkideek parte hartzeagatik, Boga garagardoaren sorta bat eta fabrika bisitatzeko eta bertan garagardo dastaketa egiteko bonua irabazteko zozketan sartuko dira.
Jokoan parte hartzeko Korrikaren atal berezian sartu behar da: Irutxulo.hitza.eus/jokoak/korrika-2022/. Epea hilaren 11n bukatuko da.
