Kopa jokatzeko gogotsu dago Bera Bera eskubaloi taldea
Ostiraletik igandera Espainiako Eskubaloi Kopa jokatuko da Donostian, Illunben. Bera Berako kapitainek lehian jantziko duten kamiseta berezia aurkeztu dute gaur.
Esther Arrojeria eta Alba Menendez, Bera Bera eskubaloi taldeko kapitainak. (Argazkia: Bera Bera Eskubaloia) 
Lau egun barru eskubaloia arnastuko da Illunben; “goi-mailako eskubaloia” izango dela zehaztu du Alba Menendezek, Bera Berako kapitainak. Garai batean Bera Bera “Kopako taldea” zela esaten zen, ondo ematen zitzaiola txapelketa hau, baina Esther Arrojeria jokalariak aitortu du azken bi urteetan ez dutela hori erakutsi, eta “esentzia hori” berreskuratzeko gogoz daudela adierazi dute.
Kopako partidak Donostian izango dira, Illunben; final-laurdenetakoak, finalerdietakoak eta finala bera. Bera Berak ostiralean bertan jokatuko du final-laurdenetako norgehiagoka. Valladoliden kontra ariko da 20:30ean.
Menendezek zein Arrojeriak uste dute kopan “partida batera, edozer gerta daitekeela”. Talde gehienek “ez daukate ezer galtzeko eta hazi egiten dira”, adierazi du Arrojeriak. Nahiz eta ligan ondo moldatu, kopan dena alda daiteke, ez du bermatzen kopan ere emaitza onak izango dituztela, eta horren adibide hurbila dauka Bera Berak: azken bi urteetan final-laurdenetan eta finalerdietan kanporatu egin zuten, gainera, bietan Elx taldeak kanporatu zuen. Arrojeriak esan du arantza kendu nahi dutela, eta gogoz gaudela.
Kopako gainerako final-laurdenetako partidei dagokienez, Elx iazko txapeldunak Xixonen aurka jokatuko du (13:00), Rocasak Malagaren kontra (16:00) eta Granollersek Atletiko Guardesen aurka (18:15). Streaming bidez ikusi ahal izango dira neurketa guztiak RTVEren webgunean. Finalerdiak, berriz, apirilaren 30ean izango dira, eta finala maiatzaren 1ean, 12:30ean. Sarrerak hemen eskuratu daitezke.
Lehen partida irabaziz gero, Bera Berak Atletico Guardes edo Granollers izango du aurkari finalerdietan eta Malaga, Rocasa, Elx edo La Calzadarekin final hipotetiko batean gurutzatuko litzateke.
«Inoizko Koparik parekatuena» izango delakoan dago Menendez. Izan ere, kopan izango diren zortzi taldeetatik, bostek badakite zer den Kopa irabaztea.
