Izurde bat agertu da asteburuan Zurriolan
Zurriolako hondartza. 
Larunbatean, lehenengo orduan, bisitari berezi bat izan zuen Donostiak, izurde bat agertu baitzen Zurriolako hondartzako uretan. Hain zuzen ere, 06:30ak aldera, herritar batzuek animalia ikusi zuten urak sakontasun gutxi zuen zona batean harrapatuta, eta Ertzaintzari deitu zioten. Segur aski, korronteek bultzatuta geldituko zen harrapatuta.
Horrela, herritar batzuk eta bertaratutako ertzainak uretan sartu ziren, izurdea laguntzeko asmoz. Olatuek ez zizkieten gauzak erraztu, baina azkenean, 07:00ak aldera, animalia itsasora itzultzea lortu zuten.
