Denboraldi historikoa itxi dute neskek eta seigarren postua ziurtatu dute mutilek
Realak zaleekin ospatu zuen denboraldi historikoaren amaiera, Anoetan. (Argazkia: Reala) 
Asteburu bikaina izan da realzaleentzat, nesken zein mutilen taldeek emaitza onak ekarri baitituzte Donostiara. Hain zuzen ere, nesken taldeak ez zuen ezer jokoan, bigarren postua eta Txapeldunen Ligarako txartela itxita baitzituen, baina ezin hobeto ospatu zuen denboraldi historiko hau: Anoetan jokatu zuten, 10.000 zaleren baino gehiagoren aurrean, eta 6-1 irabazi zioten Alavesi. Manuela Vanegasek, Gemma Gili Ginerrek, Franssik, Nerea Eizagirrek (laugarrena eta seigarrena), Amaiur Sarriegik sartu zituzten txuri-urdinen golak, eta Marta Maria Ortizek babazorroena. Epaileak partidaren amaiera adierazi zuenean, Natalia Arroyoren taldeak estadioari buelta osoa eman zioten, zaleen gozamenerako.
Mutilei dagokienez, pasa den jardunaldian Europan jokatzeko txartela eskuratu zuten, eta seigarren postua ziurtatu zuten atzo; hau da, Imanol Alguacilen taldea Europa Ligan izango da hurrengo denboraldian, hirugarrenez jarraian. Vila-realek ireki zuen markagailua, Coquelinen gol batekin, baina Realak ez zuen etsi, eta partidari buelta eman zion. Isak eta Zubimendi izan ziren goleatzaileak, seigarren postua ziurtatzeko. Partida bat gelditzen zaie txuri-urdinei, igandean Atletico Madrilen aurka Anoetan jokatuko dutena. Irabaziz gero, baliteke bosgarren postua ere eskuratzea, baldin eta Betisek galtzen badu.
Eskubaloian, Bera Bera Lanzaroteren aurka etxean jokatzekoa zen, zaleen aurrean aurreko jardunaldian irabazitako liga ospatzeko. Ordea, neurketa atzeratu behar izan zuten, kanariarrek arazoak izan zituztelako hegazkinarekin, eta ezin izan zuten bidaiatu. Orain, data berri bat jarri beharko diote partidari. Hala ere, liga beste modu batera ospatu zuten Bera Berakoek, ohorezko sakea egin baitzuten Anoetan, Realaren eta Alavesen arteko neurketaren aurretik.
Txirrindularitzan, Demi Vollering (SD Worx) txirrindulariak Igeldoko Murgil tontorrean borobildu zuen Euskal Herriko Itzulia, beste erakustaldi batekin.
PARTIDAK
Futbola
Emakumezkoen lehen maila, 30. jardunaldia
- Reala 6 – Alaves 1
Gizonezkoen lehen maila, 36. jardunaldia
- Vila-real 1– Reala 2
Eskubaloia
Emakumezkoen ohorezko maila, 24. jardunaldia
- Bera Bera – Lanzarote (atzeratuta).
