Isidro Yoldi hil da, Irutxuloko Hitzaren sustatzailea eta euskalgintzako kidea
Isidro Yoldi, Amara Berriko Urrats euskaltegian. Amara Berriko Urrats euskaltegiko zuzendaria zen, eta irakasle gisa ibili zen lanean 30 urtez. Euskaltegian lan egin zuen, eta euskaltegia bera sortu eta martxan jarri zuen kideetako bat izan zen. Herritarrek euskara doan ikasteko kanpainaren alde gogor egin zuen lan, baita langileen lan baldintzak hobetzeko. Euskaltegian bakarrik ez, euskalgintzaren hainbat alorretan ere egin zuen lan, eta konpromiso handia izan du parte hartu duen egitasmo guztietan. Bere gerizpean babesa aurkitu dute hainbat proiektuk. Osakidetza euskalduntzeko hainbat bileratan ere parte hartu zuen. Askorentzat, euskalgintzako pieza funtsezkoa izan da.
San Telmo museoan, Irutxuloko Hitzaren 10. urtemugaren ekitaldi batean.
Irutxuloko Hitzaren sustatzaileetako bat izan zen proiektuaren hasieratik, eta administrazio kontseiluko kidea zen. Proiektua sortzeko babesa eman zuten gizarte eragileen ordezkaria zen Yoldi. Amara Berrin bertan auzoko Berritsu euskara batzordean ibili zen. Euskararen aldeko hainbat jarduera bultzatu zituen auzoan. Besteak beste, euskarazko musika taldeen aldeko Garajetarrak egitasmoa, eta etorkinek euskara ikasteko Aisa proiektua. Banaiz Bagara elkartearekin ere harreman handia izan zuen, eta nabarmendu dute etorkinek euskara ikasi ahal izateko hamaika egitasmo lagundu eta sustatu zituela. Oro har, harreman handia zuen Donostiako euskararen aldeko taldeetako kide guztiekin.
Euskaltzalea eta mendizalea ere bazen; Egiako Aitzarte mendi taldean ibili zen.
