Macarena Gomez da aurtengo Beldurrezko Astearen karteleko protagonista
Carlos Fdez (Penrider) marrazkilariak egin du, eta Arteuparte Estudioa arduratu da kartelaren koordinazioaz eta diseinuaz.
Macarena Gomez aktorea, Beldurrezko Astearen kartelaren aurkezpenean. (Argazkia: Iñigo Royo) 
33. Fantasiazko eta Beldurrezko Zinemaren Astea urriaren 28tik azaroaren 4ra bitartean izango da aurten. Gaur aurkeztu dute jaialdia iragarriko duen kartela, eta Macarena Gomez aktorea protagonista duen ilustrazio bat da.
Kordoban (Espainia) jaiotako aktorea Espainiako fantasiazko zinemaren aktore adierazgarrienetako bat da. Hainbat pelikulatan lan egin du –Platillos volantes (Oscar Aibar, 2013), Las brujas de Zugarramurdi (Alex de la Iglesia, 2013) eta Pieles (Eduardo Casanova, 2017). Eta pelikula hauekin izan da Beldurrezko Astean: Dagon (Stuart Gordon, 2001), bere lehenengo lanetako bat, eta Musarañas (Esteban Roel eta Juanfer Andres), 2014ko edizioari hasiera eman ziona.
Kartelaren egileak, Carlos Fdezek (Penrider), esan du lan hau egiteko zerbait “aztoragarria” egin nahi zuela: “Proba batzuen ondoren, aurrez aurreko plano txundigarri bat aukeratu genuen, Macarenaren begirada, ikusleari zuzenean begira, ilustrazioari indar guztia emateko”. Arkatzezko marrazkian eskarmentu handia du, degradatuaren teknika baliatuz misteriozko giroak deskribatzea da bere lanaren asmoa. Munduaren ikuspegi tragiko bat eta tematika surrealista bat biltzen dituen lana da, eta bere bitartez ametsak, sentimenduak eta emozioak irudikatzen ditu. Aintzakotzat hartzen ez direnen bakardadea interesatzen zaio, eta natura, animaliak eta Lurraz haraindiko espazioa maite ditu. Beti saiatzen da istorio txiki bat kontatzen interpretazio desberdinak jasotzera irekia dagoen amaiera batekin, era horretan ikuslea tartean sar dadin. Beldurrezko Astearen kartelean armiarma bat marraztu du, eta jaialdiarentzat, sorreratik, ikur garrantzitsua izan da.
33. Beldurrezko Astearen kartela.
